Ккуллал райондалийсса «Инсан» фондрал вакилтал ларгсса шинал Ваччав ятинтурачIан ссайгъатру-кьуцуртту биян буван лавгсса кIанай, миннан кьурчIи бивзун бия ца кулпат лекьавайсса къатраву, лащинну яхъанай бушиву. Фондрал бакIрайн лавсун бия кIа мюхтажсса кулпатран Ваччав къатри дуван.
П. Рамазанова
Ца шинал лажиндарай вайннал ккаккан бунни хъинбалдарансса даву дуван ччинан дувансса чарангу лякъайшиву. Цанна дуллалисса кунна, дакI цIий, зий бур жагьилтал. «На вайннайнгу, чIарав бавцIуцириннайнгу барчаллагьрай бура. Ваччиял шяраваллил администрациялулгу къатри дансса кIану буллунни, цивппа Ваччиял жяматгу чIарав бавцIунни, фондралгу на ттулла дардиращал навалу къакьабивтунна»,- тIий бур ятинтал хъуни буллалисса Фиалка Аьбдурашидова.
Къатри дурну къуртал хьун дурар.
Ккуллал райондалийсса «Инсан» фондрай каялувшиву дуллалисса Ислам ХIажибуттаев ур кIай къатри чулийн дуккан дуван чIарав бацIияра, бувсса хъинбала хъинбалану занабикIантIиссар тIий. ДакI дирсса арцу дичин хьунтIиссар Сбербанкрал ва карталийхчин: – 42 76 6000 48 73 1810. Ягу телефондалул номерданийн: – 8 963 414 11 77.
Шиккува ца укунсса затгу кIицI бан ччива. «Инсан» фондрал давурттая «Илчилий» буслан бивкIун махъ редакциялийн оьвтIийгу, букIлайгу бур инсантал, цанмагу кумаг бува учара, ягу фондрал вакилтуращал кIул бувара тIисса. Фондрал пресс-къуллугърал бувчIин бунни кумаг аьркинми хасъсса документирттащал цачIанма бучIан аьркиншиву, яла, цивппа хъирив бивзун, буниялттунгу мюхтажшин цуксса дуссарив кIул бувайшиву ва так муния мукьах бувайшиву кумаггу.
