Самара шагьрулул ца лишан кунасса лаккучу

Ялун нанисса мартрал 18-нний жула билаятрай кIицI лагай­ссар Машлул ва коммунал хозяйствалул зузалтрал кьини. Ва кьинилун хасну бусан ччайгу бур сайки 60-хъул шиннардий архсса Самаралий уссал усттарну зузисса жула лаккучу, Уручуллал шяраватусса ХIаммадов Ибрагьимлуя.

Залму АьбдурахIманова
Цала шагьрулул лайкьсса чувная цимилвагу чивчуну бур Самараллал журналистуралгу.
Самара шагьрулул дязаннивсса кучалий, халкьуннал «Сталинка» тIисса цIагу дирзсса, лахъ къатрал лувсса чIивисса уссал киоск най бунува ля­къин бигьассагу бакъар.

Дакъар ши­кку уттизаманнул афишагу, иттав ххяхлахисса рекламагу. Так чIивисса чIавахьулттивух чIалай дур, кьус-кьусгу ивкIун, цала кьютIилу-къяцIагу бувгьуну, усса­ха зузисса угьарасса усттарнал анжагъсса бакI. Ва ккаллину ур Самараллал тарихрал ца бутIа кунасса инсаннан, ва шагьрулун акъа чара бакъасса усттарнан. «Сарафан радиолувух» бавсса кунма, ванал танахь, таманал кIанахь буслай, цIа дургьуну, усру ларсун бучIайсса бур шагьрулул агьлу ваначIан.

«Билаятралгу, хIукуматралгу, шагьрулулгу цIардугума даххана дунни, ца бакIчи лавгун, цама увкIунни. Жула Ибрагьимма тIурча, гъинагу- кIинагу га унийва уссар цала чIирисса кьютIилттух хъуннасса ва бусравсса давугу дуллай», — учай тIар тиччаллил агьулданул.

Мартрал 15-нний ванан 78 шингу хъанай дур. Ва увсса кьинигу, ца кулпатран ва гъан-маччанан дакъассагу, киоскрал лагма-ялтту яхъанахъиминнангу, чIаххуврангу, жула шихасса ватанлувтурангу кIулну кIицI лагайсса дур. Укун хIурматрай ур жула Ибрагьим гъурбатрай. ВаначIа яхши-хаш буллали­сса инсан акъасса, киоскраву бизаршиву дусса чIун дурагу къашайсса дур.
Ибрагьимлул цала киоскрал чIиви чIавахьулттивух тихунмайгу, шихунмайгу гьар кьини тIайла буккайссар цала муштаритал.

[dropcap]В[/dropcap]анал итталух дукъарксса янна-ус, ххютру ва сумкарду бакъахьунссар тIар 60 шинал мутталий.
— Ххирар ттун ттучIанма бувкIминнащал вания-тания гъалгъа тIун. Ттула пишалухагу зий, хъамалгу кьамул буллай, — учай ванал цалагу.
Ва ца хъун дакъасса макьалалийнугума чIалай ур жула ватанлув цуксса хIурмат ва бусрав бусса инсан уссарив чил шагьрулий.
Махъ шиннардий Ибрагьимлуща, хьхьичIава куна, иттххяв­ххун Дагъусттаннайн учIангу бюхълай бакъар. ХьхьичI шиннардий тIурча, гьарца шинах Ватандалийсса уссурссунначIан къаивну, хъамалу къаувкIун къаикIайсса ивкIун ур. Дагъус­ттаннай ванал ца арс ва ца душгу яхъанай бур. Самаралий цачIава тIурча, кIия арс ур.

ХьхьичIва Куйбышевск тIи­сса цIагу диркIсса ва шагьрулийн Ибрагьим агьну ур 1958 шинал, цала буттарссичIан хъамалу лавгсса аьрххи сававну. Волга неххацIсса шагьрурдах, щархъах ва шиккусса тIабиаьтрах эшкьи хьусса жагьилнал тиккува миналул хьун пикри бувну бур. ЦIубакIрай зий ивкIун ур къалайчину.
Ватангу, буттал аьрщигу дакIния къалагайсса Ибрагьим Дагъусттаннайн цал ттигу иян­сса хиялданийгу ур. Ва усса кучалий ялапар хъанахъисса халкьуннангу цала уссал усттар тикку къазузисса кьинилул ялув пикривагу бан ччай бакъар.

«БикIувча ванал бакIгу кIяла хьуну, канил бюхъу-бажаргу чан хьуну, амма жула усттар жула итталу ччай ур», — тIий бур ванал дуссукъатлувун гъирарай бучIайсса муштаритал.
Вайннан Ибрагьим цала шагьрулул тарихрал ца яргсса лишан кунасса инсанну чIалай ур.
Гьарца цащала яхши-хаш­райманахьгу Ибрагьимлул бусайсса бур Дагъусттанная ва шикку яхъанахъисса чIяву миллатирттал дянивсса дусшиврия ва нахIу-хIалашиврия.
— Жул мазру ца лавхьхьусса бакъанугу, аьдатру, эбадатру, культура ва тарих цава-цассар, ссурахъал-хъинирвал кунмассар миллатругу, — учай тIар ванал.
Ци даххана хьурчагу ду­ссукъатлуву, цува щяикIайсса кIанттуйсса яттил бурчул цIихъарив Ибрагьимлул ссахчIав къабулай.