ХIал кIюламиннан – куклусса хIаллихшин

Пахиев Сабир

Жула республикалий махъсса ппурттуву хъинну чIяву хьуну бур стоматологиялул клиникартту. Вай клиникарттава цала пиша куртIну кIулсса хIакин язи угьангу бигьа бакъар.

Аммарив, цала даву дакIнихтуну, хьхьичIунну дуллалиминнаягу инсантуран ччяни баяй. Хъунма хIал къавхьунни Ххутрал шярава­сса жагьилсса хIакин Пахиев Сабирдул стоматологиялул клиника тIивтIуну. Ккарччал хIакиннал даву вайннал кулпатрал ирсирай нанисса пиша бур. Ванал бутта ва буттал буттагу цIанихсса ккарччал хIакинтал бур.


Имара Саидова
2013 шинал Дагъусттаннал медициналул академиягу къуртал бувну, Сабир, даврил опыт лахьлай, зий ивкIун ур «Сивак» клиникалий. Ччясса мутталий лархьхьуну дур ккарччал хIакиннал пишалул кьюлтIшивуртту. Цала хиял бартлаган бувну, тIивтIуну бур ванал уттизаманнул оборудованиярттал дузалсса стоматологиялул клиника. Ванин цIагу дирзун дур «ХIакин Пахиевлул стоматология» тIисса.
Клиникалия бусаннин, кIицI лаган ччай бура Сабир сайки гьарца нюжмаркьини ахIвал-хIал кIюласса кулпатирттавасса инсантуран укра ккарччив хъин дуллай ушиву. Ва барчаллагьран лайкьсса, дугърисса даву дуллалисса хIакин лаккучу ушиву кIул хьуну, хьунабакьинсса пикри хьуна ттунгу.

Сабир Пахиев

— Сабир Артурович, ци-ци журалул кумагру байссар вил клиникалий?
— Клиникалий терапиялул, хирургиялул, ортопедиялул чулухасса цинявппагу журалул кумагру бувайссар ва хъин дайссар ккарччив. Мукунна клиникалий дишайссар личIи-личIисса журалул ккарччив, байссар протезру. Дакьин даннингу, дурну махъгу, ккарччив ци тагьарданий дуссарив ххал дайссар рентгендалул кумаграйну.
— Яла чIяруну цукунсса дикIай ккарччал азарду?
— Ччя-ччяни хьунаакьара, кIюрххилнин ккарччул оьсса къюву дурхIуну, азурда хьуну бувкIсса къашайшалтращал. Мукунма, чIявусса бучIай ккарччал кьюкьа саргъун дан, кIяла дан ччисса инсантал.

— Ци хIисавравун лавсун, цукун язи угьан аьркин­ссар ккарччал хIакин?
— Даву канилух дурксса, опыт бусса хIакин инсантуран ччяни кIул шай. Цума-цагу хIакин психологри. Мунияту хъунмасса бияла буссар хIакиннахь къашайшала нахIусса мукъуйну кьамул авриву. На мудангу тикрал буллан икIара, цIа дурксса, ххуйсса клиникарттах къалуглай, язи угьара вихшала дишинсса хIакин тIий.

— Буси жул буккултрахьгу ккарччив ядуван аьркинсса куц.
— КIюрххил ва кьунниялай чара бакъа 5 минутIрал мутталий марцI дуллан аьркинссар ккар­ччив. ДачIи шинай цал аьркинссар ккарччал хIакинначIан бучIаван. Вайри ккарччив цIуллу-сагъну ядан ччиминнансса яла агьамми маслихIатру.

— Ккарччал синтту хьхьарасса, оьттун дуцлацисса инсантуран ци маслихIат ккакканна ина?
— Жура ишла дуллалисса щин кьянкьасса ва заралсса ферментру бусса душиврийну синтту хъиннура зия хъанахъиссар. ЧIявусса инсантал бучIай ккарччив хъахъи ларгун, чарил къат даркьусса. Синтту хьхьара шаврил хъунмур сававгу хъана­хъиссар ми ххуйну къаядаву ва чIумуя чIумуйн ккар­ччал хIакинначIан къалагаву. Мукун, синтту дияйнин диян диртсса чIумал, пародонтоз хьуну, ккарччал мархри чIалачIи шайссар. Мукунсса синтту хъин дан шайссар так пластикалул хирургнал кумаграйну.

— Цукунсса маслихIатру банссия ина мюрщи оьр­чIал ккарччив ядуван?
— НакIлил ккарччив кьатI шайсса ва цIусса дуккайсса цалла-цалла чIун дуссар. Мюрщи оьрчIал ккарччив аьян диртун, ялув къабацIларчан, цIуну дурккун нанимигу дарккусса, хьхьарасса дикIайссар. Мунияту, мюрщулт хIакинначIан буцлай, миннал ккарччал ялув бацIлан аьркинссар.

— Вил пикрилий, цукун­сса тапаватшиву дур жучIавасса клиникар­ттай, дазул кьатIувминнух бурувгун?
— Оборудованиярттал, аьр­кинсса материаллал щаллушинна жучIарагу тай яла хьхьичIунми клиникарттай куннасса дуссар. Так ми клиникарттай зунсса цала даву куртIну кIулсса профессионалталли аьркинсса.
Пахиев Сабирдул стоматологиялул клиника зий бур
МахIачкъалалив, Энгельслул цIанийсса 47 «ж» кIичIираву.