Кказитрахасса хIурмат – миллатрахасса хIурматри

Цинявппагу бия ва кьини тIутIайх бивчуну

ТIутIал кацIругу, тIутIайх дирчусса дакIругу

Ларгсса итникьини «Илчилул» редакциялий чIявусса хъамалгу бавтIсса унгу-унгуну ххарисса кьини хьунни. Исвагьину бакьин бувсса хъунама редакторнал кабинетраву дакIру чанна дуллалисса тIилисин бия.

ПатIимат Рамазанова
Дурусну кIива зурул хьхьичI, вава кабинетраву, цIусса шинал шадлугърайн цачIун хьусса ппур­ттуву, жул муданмасса дустурал хIукму бувна «Илчилул» редакциялул чIалачIин чIирину-хъунну ххуй дуван, яни ремонтрацIун дархIусса даву сакин дан. Диялсса давурттугу дурну, редакция чанна лахъан баврил савлугъ дуванъяв итникьини бавтIссагу.

Мажлис бачин бувну ия Ссапарбаг Аьбдуллаев

Лакрал язисса чиваркIуннал кьюкьа «Илчилул» коридорданувух тIутIал чIаннугу дурцIуну нанисса лахIза я щуманан асар хьунсса бия. Дурсса даврил савлугърацIун, хъаннил кьинигу гъан хъанай духьувкун, тIутIивгу ххишала дакъа иширацIун даркьуну чIалай дия. ТIутIив цирдагу сиреньдалул рангирайсса чагъардаву дархIуну дия. Сиреньдалул рангирал чаннал дурцIуну, ца караматну чIалай дия жул лахъи ларзугу. Цаннаяр ца бювхъусса, къилигъ дусса вирттал тIутIащал нанийни, Голливудравасса кинорал ца лахIза хханссия.

БакIра-бакIрах кIицI лагангу ччай буру, мукун тIутIалгу кIутIу тIий, редакциялийн бувкIсса хъамаллурал цIарду: Сиражуттин Илиясов, Юсуп МахIаммадов, Ссапарбаг Аьбдуллаев, Марат Илиясов, Сайпулла Аьвдуразакьов, Султан ЦIаххаев, Зиябу­ттин ХIажимирзаев. Му кьини «Илчилий» буссия цайми-цаймигу бусравсса хъамал: ДР-лул культуралул министр Зарема Бу­ттаева, Лакрал театрданул хъунмур Бад­рижат МахIаммадхIажиева, теат­ровед Гулизар Султанова ва м.ц. «Илчилул» хъунама редактор Руслан Башаевлул ва ремонтрал даву бакIуйн дуккан дувансса кабакьу бувсса цинявннайхвагу бавчIуна Барчаллагьрал чагъарду. Редакциялул арамтурал чулуха Гульшан Хасаеван пишкаш дуруна аьнтIикIасса щюлли чала­гъайгу. Бахшишран хIисавсса бия ва кьини куннахь куннал тIутIисса барчаллагьрал махъру.

Министр-душнингу хъункIултIутIив

Зарема Ажуевнаяту тIайла хьуну, циняв, ца зумату кунма, барчаллагьрай бия дурсса даврил сакиншинна цийнна ларсун бивкIсса Гульшан Хасаевайн, цивппа редакциялул чIалачIин ххуй дуллалисса иширавух хIала буххан бувну тIий. Буниялттунгу, чIирай лархъсса гьарца суратравура, гьарца аьщу-ххуттавура дирхьусса хханссия Гульшаннул дакIнил дуниял. Гьай-гьай, дизайнернал кагу хIалану. Ва ялагу, Гульшан цуппагу жул коллективращал архIал субботникрайнгума бувкссар. Мунияту даву ябацIанну дюрхъунура шаврил ссигъагу ванил дакIнил ца караматсса бутIар тIий буру.
Жул шадлугърал сий ххуй дуруна лакрал ххаллилсса балайчитал ХIажиаьли ХIажиаьлиевлул, Шагьалай МахIаммадовал, Рашид Багатаевлул.

Щалвагу коллективран ххишала дакъа асар хьунни лакрал язисса арсурваврал ва душваврал уртакьну дурсса ва даву. Асар шаврил хъунмур сававгу, ялун чIалачIисса редакциялул аьнтIикIашиврувунияр, миллат­рал кказитрал дуллалисса даврил агьамшиву ва кьимат кIулсса, жулва чIарав бацIан чялишсса инсантал бушиву дия. Ца ялагу, бухкъалагайсса барчаллагьрайгу буру Гульшан Хасаевайнгу, Сиражуттин Илиясовлуйнгу, Юсуп МахIаммадовлуйнгу, Артур Исрапиловлуйнгу, Марат Илиясовлуйнгу, Ссапарбаг Аьбдуллаевлуйнгу, Сайпуллагь Аьбдуразакьовлуйнгу, Султан ЦIаххаевлуйнгу, Зиябуттин ХIа­жимирзаевлуйнгу, Бэла Багъдуевайнгу, Рашид Багатаевлуйнгу, ххуйва- ххуйсса холл-диван ласун кабакьу бувсса «Дараччи» ккурандалийнгу, Зарема Бу­ттаевайнгу (сиреньдалул рангирдайсса чагъардаву бавхIусса тIутIал кацIру биякьай бавкьуну Зарема Ажуевнал пишкаш був­сса сиреньдалул ранг хIаласса бартбисулуцIун, вагу ца хаварбакъулийсса ххуйшиврул ссигъа бия!), чIавахьултталсса бувсса Аьли Аьлиевлуйнгу, магъул даву дурсса Муслим Катаевлуйнгу (Центр натяжных потолков ROYAL), ххаллилсса кухня буллусса Ида Саймаевайнгу (фирма НОКУ), суратру дишинсса хахру бувсса Каламаттин Кьурбановлуйнгу (ттучан ВЕРНИСАЖ), дизайнер ХIажи Гитинаевлуйнгу. Барчаллагьрай буру дакIнихтуну захIмат бувсса усттартурайнгу.
Цал ттигу тикрал бан, кказит­рал редакциялуха бувсса хIурматгу, захIматгу щалвагу миллатрахассар. Бувмур арулххуттай хъинбалану зана бикIаннав тIий, дуаьлийгу буру!
ХIасил, ца ххуйсса макьан кунна, цасса дия интнил цалчин­сса кьинирдавасса итникьинигу, тIутIал кацIругу, тIутIайх дирчусса дакIругу.