Ххуллункьини «Дагестанская правда» кказитрал редакциялий мартрал 28-30-нний хьунтIисса регионнал дянивсса «АНЖИЭКСПО» выставкалун хасъсса пресс-конференция хьунни.
З. АьбдурахIманова
КIира кьини Национал библиотекалий нантIисса выставкалий тамашалун дишинтIиссар уттизаманнай строительствалул аралуву, архитектуралуву ишла дуллалисса хъус. Мукунна дикIантIиссар инновациялул хъус-матахIгу.
Выставкалия гьарта-гьарзану, цала хьхьичI бивхьусса масъаларттая ва аьмну хIадуршиндарая журналистурахь бувсунни «АНЖИЭКСПО» компаниялул хъунама Мукаил Исмяиловлул, ванал хъиривчу МахIаммад Саругълановлул ва ДР-лул Машлул палаталул вакил Гулпери ХIамзатовал.
«Жулла республикалий, вайми арардах бурувгун, лябукку ва маэшат буну ца хъинну хьхьичIуннай итххярхмур аралун ккаллийну дур строительствалул ара.
Жула халкь хIарачат бусса, къулаймунил кьимат бищун кIулсса халкь бур, мунияту шиная шинайн лахъ хъанай дур жула тIалавшиннардугу, каширдугу. Выставкалия хьун аьркинссар инвестортал цачIун буцинсса, цаннащал ца кIул бансса ва муштаритурал тIалавшиннардая хавар бансса майдан», — кIицI бунни Мукаил Исмяиловлул.
Выставкалул лагрулий цала хъус ккаккиялун дуккан дурсса компаниярттаща бюхъантIиссар муштаритуращал кьутIирду чичин ва ишбажаранчитурансса мастер-классирттах вичIи дишин. Строительствалул хъунисса компаниярттан дакъасса, шикку цала къатраву чIири-хъунсса ремонтру дан ччисса укунмасса халкьуннащагу цанна аьркинмур хъуслил качество ххал дан, хъирив лаян, кIул-къакIулмуния цIуххин бюхъантIиссар.
Выставкалул лагрулий мукунма хьунтIиссар инновациялул, строительствалул аралуву ишла дан бучIисса нано-технологиялул презентацияртту ва личIи-личIисса проектирдая бусласисса батIавуртту.
Ккаккиялун дирхьуну дикIантIиссар архитектуралул, строительствалул проектру дувайсса ттизаманнул оборудование, ремонтру дувайни ишла дайсса матахI, нузкьунтту, фасадру дайсса материал, ттукI буцайни ишла дайсса хъус, гъилишиврул, вентиляциялул, кондиционердал, щинал оборудование, дарвазартту байсса ярагъ ва цаймигу хъус.
