Щалвагу Лакку билаятрай БатирхIажинал арс ХIалим Батировлул цIа къабавсса, къакIулсса хъинну чансса бакъа бакъахьунссар. Лакрал райондалул тарихрал биялсса парчагу, ванал оьрмугу цанния ца батIул бан бюхъансса бакъар.
Увну ур ХIалим интдайдихьулул кьини, мартрал 22-нний, 1919-кусса шинал ЧIарттал шяраву. Буттал шяраву арулва класс къуртал бувну махъ бувккуну бур Гъумучиял цIанихсса педагогикалул техникум.
[dropcap]М[/dropcap]у къуртал байхту, 1937-ку шинал тIайла увккун ур учительну зун Бархъаллал шяравун. КIира шинава ивтун ур мува школалул директорну. Амма чIал къавхьуну байбивхьусса дяъвилул кьукьин дурну дур ванал педагогшиврул карьера – цала хушрай ва лавгун ур аьрайн. Ванал бюхъу ва гьунар гава цIана ялун ливчуну бур аьрайгу: бивтун бур дяъвилул ххуллу, политрукнал хъиривчуная байбивхьуну, танкардал роталул командирнал къуллугърайн ияннин.
Талатавурттаву чIалачIи дурсса къучагъшиврухлу ХIалим лайкь хьуну ур ЯтIул Ттугълил ва ЯтIул ЦIукул даражалул орденнан ва чIярусса медаллан. Аьрай ванайн дирну диркIун дур хъинну захIматсса щавурду, бувну бур кIива жапасса операция. Ми гьарца затгу бувхIуну, щалва дяъвилувухгу увккун, зана хьуну ур буттал шяравун 1945-кусса шинал. Зана шайхтугу, зун ивкIун ур кIара цалла дакIнин маччасса, ччисса даврий – буттал шяраваллил школалул директорну. Мичча ва увцуну ур зун райондалул ОНО-рал хъунаману.
[dropcap]М[/dropcap]уния махъ, партиялул лахъсса школагу къуртал бувну, ХIалим 18 шинал мутталий зий ивкIссар Лакрал райондалул исполкомрал председательну. Пенсиялийн увккун мукьахгу зий ивкIссар: «Ххяххабаргъ» кказитрал редакторну – 5 шинай, Гъумучиял дянивмур даражалул школалул директорну – 4 шинай, Лакрал тарихрал ва улклул музейрал директорну. Анжагъ вай давуртту ва къуллугъру зумух ласаврийнугума чIалай бур цуксса чантI увкусса, итххявхсса, бюхъу ххисса инсан ивкIссарив ХIалим.
Оьрмулул бугьараминнан хъинну ххуйну кIулссар, дакIнийссар, щалагу райондалий, цинявппагу жяматирттал дянив, ванайн мудангу, лахъа-хъунсса хIурматрай, ХIалим Батырович бакъа къаучайсса бивкIшиву. Ва хIисавну ивкIссар ваца райондалул «визитный карточка» кунасса вакилнан.
Ва бусравсса цIанил бияла хIакьинусса кьинигу яхьуну буссар буттал шяраваллил жяматрал дянивгу, Лакку улклуйгу, ванал наслулул агьлу-авладрайгу.
ХIалал дурссар ХIалим Батыровичлул хIурмат лавайсса цIа цала яхI ххину ва яргну бувтсса оьрмулийну, язи-язисса давурттайну. Цал бунагьирттал аьпа баннав, ванал цIанил биялагу яхьуну личIаннав цимирагу никирай!
Жул корр.
