[dropcap]В[/dropcap]ай гьантрай жул редакциялийн увкIун ия, цIуминалийсса ЦIуссалакрал райондалул азарханалул зузалтрахь кказитрайхчIин барчаллагь учин ччива тIий,
ТIюхчардал шяравасса ххаллилсса учитель Загьиди Маммаев. Шиккува кIицI лаган, Загьиди цалчинсса инсан акъар ва азарханалул зузалтрая рязину укIлакIисса.
Гьашину 10 шин хъанай дур цIуминалий ва азархана тIивтIуну. Азарханалул шартIирдая, шиккусса зузалтрал пишакаршиврия ччяни цIа дурккунни. ХIакьину шиккун букIлай бур, цIуминалийсса шяраваллал, чIаравсса Кривая Балка поселокрал агьлу бакъассагу, шагьрулияссагума къашайшалт. ЧIявусса къашайшалт кьамул бан багьлагьишиврийн бувну, хъунмасса гуж багьлай бур азарханалул зузалтрайн. Ци чулийгу вайннал дакI тIиртIуну кьамул уллай ур гьарцагу цачIана увкIсса къашайшала.
Цумур-цагу идаралул иш бачин бан хъунмасса бияла бикIай каялувчинал. Цила даву ххуйну кIулсса, бажар бусса каялувчи бакIрайн багьаврийнугу тIайлабацIу хьуну бур цIуминалийсса азарханалун. Къашайшалтраясса барчаллагьгу баян бан, Хъаннил байрангу барча дан жу хьунабавкьуру азарханалул хъунмур хIакин Булбул Исрапиловащал ва ванил коллективращал.
1986 шинал Дагъусттаннал медициналул институтгу бувккуну, Булбул зун байбивхьуну бур ЦIуссалакрал райондалул азарханалий акушер-гинекологну. Дяъвилул ишру байбивхьусса 1999 шинал зун бивкIун бур цIуминалийсса амбулаториялий. 2009 шинал бивтун бур цIуну тIивтIусса азарханалул хъунмурну. Булбул Исрапилова бур Дагъусттан Республикалул лайкь хьусса хIакин. Шиккува ккарччал хIакинну зий бур Булбуллул душ Аминагу.
[dropcap]Ч[/dropcap]Iявуссанная баллай бур терапиялул отделениялул хъунмур, цIа дурксса Къажлаевхъал тухумраясса Къажлаева Аида Набиевнал пишакаршиврия.
2002 шинал Дагъусттаннал медициналул институтгу къуртал бувну, шагьрулул 2-мур азарханалий терапевтнал пиша лахьлай бивкIун бур. Мунияр махъ ца шинайсса зий Аида бивкIун бур шагьрулул 7-мур поликлиникалий. Терапиялул хIакиннал пиша лахьхьаврий гьашиву къадурну, ванил лавхьхьуну бур анестезиолог-реаниматологнал пишагу ва мунийн багьайсса интернатура бувккуну бур Москавлив. 2010 шиная шихунмай Аида зий бур ва азарханалий.
Терапиялул отделениялий хъунмур медсестрану зий бур Чапаевкаллал шяравасса КьурбанмахIаммадова Эльфрида. Каспийскаллал медициналул училищагу къуртал бувну, зий бивкIун бур ЦIуссалакрал райондалул азарханалий. ЦIуминалийсса азархана тIивтIуния шинмай шикку зий бур.
Къараева Лейла:
— На ялапар хъанай бура Кривая Балка поселокрай. Къашай хьуну, шиккун бувкIра. ХIакинтурал хъуннасса аякьа дунни. Шагьрулул азарханардаяр ххуйсса шартIру дусса, марцIсса азархана бур. СсихIвагу ласун къахъанахъисса даражалий бувкIссияв на шиккун, кIива гьантлул дянив ччаннай бацIан бунна. ДакIнихтуну барчаллагьрай бура щалагу шиккусса медициналул персоналданийн. Шичча буккайхту, Дагъусттаннал ЦIуллу-сагъшиву дуруччаврил министерствалийнгу барчаллагьрал чагъар гьан бан дакIний бура.
Барча дуллай буру азарханалий зузисса цинявппагу хъаннихь байран.
Андриана Аьбдуллаева,
Имара Саидова
