Мартрал 1-нний МахIачкъалалив «Дусшиврул къатраву» хьусса батIаврий ххал бивгьунни республикалул чIиримур ва дянивмур ишбажаранчишиврул субъектирдан кьай-кьуйлийнусса ка-кумаг баврил масъалартту.
Мунил сакиншинначи хьунни МСП-лул (малые и средние предприятия) федерал корпорация ва ДР-лул Хъуслил министерствалул ишбажаранчишиврул ва инвестициярттал агентство.
БатIаврий махъ лахълай, Дагъусттаннал ХIукуматрал председательнал 1-ма хъиривчу ХIажимахIаммад ХIусайновлул бувсуна му батIаврий ххал бигьлан бушиву ишбажаранчитуран МСП-лул корпорациялул ва МСП Банкирал чулуха арцуйнусса, гарантиялул ва лизинграйнусса ка-кумаг баврил масъалартту. «Дагъусттаннал ХIукуматрал ва МСП-лул корпорациялул дянив шанна шинал хьхьичI кьутIи чирчуну диркIссар чIиримур ва дянивмур бизнесран ка-кумаг баврил ва лядуккан даврил хIакъираву.
Му ххуллий жулла республикалул хъин чулийсса ккаккияртту чIалачIи дунни. Гьашину январьданул 10-нний республикалул МСП-лул субъектирдал цасса реестрданий сияхIрайн ларсунни 35,5 азарда МСП-лул субъект, ми дукIуминнуяр 9,6% чIяруссар. Дагъусттаннал микрофинансированиялул фондрал чIиримур ва дянивмур бизнесрал сайки 20 субъектран дуллуссар 23,5 млн. къурушрансса заемру. Гарантиялул фондрал МСП-лул 6 субъектран дуллуссар 8,2 млн. къурушрансса тапшурлугъ (поручительство). Гьашину Дагъусттаннал лизинграл компаниялул шанна кьутIи чирчуссар лизинграл арендалул хIакъираву. Амма ми ккаккияртту вари чинсса дакъар. Ми цифрардах буругарча, МСП лядуккан давриха жува зий бакъару.
Ца яла хъунмур захIматшиву микку хъанахъиссар властьрал ва бизнесрал дянив гьассаксса дахIаву дакъашиву. Бизнесчитурал бизнесрайн дакъасса, кулпатирттайнгума нигьачIаву диллай дур. АьФ-лий ПСП-лул корпорация хьхьичIуннай шаврийну бартдигьлай дур ишбажаранчитуран кумагрансса чIярусса программартту. Жулва хьхьичI бур уттинин жува бакIуйн буккан къабувсса масъала – хъуслил ва аьрщарал участокирттал реестр (сияхI) даву», — увкунни ХIажимахIаммад ХIусайновлул.
Яла ихтилат бунни «Корпорация МСП» АО-лул дирекциялул каялувчи Андрей Чуевлул. Мунал бувсунни чIиримур ва дянивмур бизнесран паччахIлугърал чулухасса кумаг баврил ххуллурдая.
Муния махъ республикалул кIанттул цилакаялувшиврул органнал цаппара вакилтурал бувсунни цалла дурсса давурттая ва хьхьичIун дагьлагьисса захIматшивурттая.
ХIадур бувссар
ХI. Аьдиловлул
