[dropcap]В[/dropcap]ай гьантрай МахIачкъалалий ДР-лул БакIчи Владимир Васильевлул каялувшиврий хьунни ДР-лий аьдлу-низам щаллу даврил координациялул батIаву.
Муний цаймигу масъаларттацIун ххал бивгьунни Дагъусттаннал хьхьирий закондалий бакъа чавахъру бугьлагьиминнайн къарши буккаврил масъала.
[dropcap]М[/dropcap]у ххуллий дуллалисса давурттаяту бувсунни ДР-лийсса Аьрасатнал ФСБ-лул Дазул управлениялул хъунама Алексей Буеровлул. Мунал тIимунийну, управлениялул зузалтрал зевххуну бур 10 азарунния лирчусса метрардай манзилданий бивхьуну бивкIсса чавахъру бугьайсса ярагъ, бухлаган бувссар браконьертурал 2 къуш, чивчуну бур 250-нния ливчусса протоколлу административ закон лиян даврил хIакъиравусса. 2018 шинал закондалий бакъа Дагъусттанная цайми регионнайн чавахъру тIайла буклай бивкIсса 7 ххуллу кьувкьуну бур.
[dropcap]М[/dropcap]укунма лавкьуну бур Къазахъисттанная Аьрасатнавун чавахъру тIайла буклай бивкIсса ххуллугу. Зевххуну бур закондалий бакъа бахлай бивкIсса 22 тонна чавахъирттал, миннувату – 17 тоннаксса ятIул чавахъру. Аьрист рирщуну дур 100-нния ливчусса мюрщи жамирдай, 160-нния лирчусса лодкардай. Бачин бувну бур 49 силистта, судрахьхьун уллуну ур 19 инсан.
Мува масъалалул хIакъираву ихтилат бунни ДР-лул тIабиаьтрал луртандарал ва экологиялул министр Набиюлла Къарачаевлул. Мунал бувсунни республикалий бярду бувну, миннуву чавахъру лувгъи буллалаврил давурттая, Сулак неххай къизил балугъру лувгъи булланссагу ттизаманнул заводру буллай бушиврия.
БатIаврий гьаз бунни цаймигу масъалартту.
