ЦачIун був аьралуннал (ОГВ) хъуними ва гужирдал структурардал каялувчитал гьуртту хьусса совещаниялий Нацгвардиялул аьралуннал федерал къуллугърал хъунаманал хъиривчу,
генерал-полковник Сергей Меликовлул микку гьуртту хъанахъими кIул бунни цIуну ивтсса Ухссавнил Ккавкказуллал ЦачIун був аьралуннал хъунама, генерал-лейтенант Василий Федоруклущал. Ванал бувсунни Василий Федорук аьрали даврил опыт бусса ва Ухссавнил Ккавкказнаву террорданийн къаршисса операциярттаву гьуртту хьусса зузала ушиву.
А. Аьбдуллаева
В. Федорук ивтун ур Игорь Семиляклун кIанай. Ва тIурча, ивтун ур Национал гвардиялул Хасъсса гужирдал агьаммур управлениялул хъунаману.
Сергей Меликовлул бувсунни Семиляклул каялувшиндаралу ЦачIун був аьралуннал цала къуллугърал буржру лайкьсса даражалий бартбигьлай бивкIшиву.
— Ухссавнил Ккавкказуллал ЦачIун був аьрал 20 шинал лажиндарай Ухссавнил Ккавкказнаву терроризмалийн къарши бавцIусса, низам ва паракьатшиву дуручлачисса агьаммур гужну ккалли хъанахъиссар. Ва управлениялул хIарачат буллалиссар региондалий мюхчаншиву ва низам дузал даву мурадрай цинярдагу гужирдал структурардал, исполнительный властьрал ва кIанттул цила каялувшиндарал органнал дуллалисса давуртту цачIу, хIала-гьурттуну дачин дан, — увкунни С. Меликовлул.
Ванал барча бунни И. Семиляклул ва В. Федоруклул цIусса къуллугъру. Ахирданий ванал дуллунни наградартту давриву хьхьичIунсса аьралитуран ва Росгвардиялул зузалтран.
