Росгвардиялун – шанна шин

МахIаммад Баачилов

Тталаткьини «Дагестан» РИА-лий хьунни Дагъусттаннал Росгвардиялул управлениялул хъунама, 

полициялул генерал-майор МахIаммад Баачиловлул пресс-конференция.Ванал бувсунни чIал къавхьуну шанна шин бартлаглагишиву Росгвардиялул федерал къуллугъ сакин хьуну.


Андриана Аьбдуллаева
2016 шинал октябрь зуруя шинмай Дагъусттаннал Росгвардиялул управлениялул зузалт байбивхьуну бур цала къуллугърал буржру бартбигьлай. Ва чIумул дянив структуралул бартбивгьуну бур азарвахъул бигарду: жяматийсса низам дуруччаву, терроризмалул ишир­ттан ххуллу кьукьаву, террорданийн къаршисса ва цаймигу хасъсса операциярттавух гьур­тту шаву, ярагъ ишакаш баврил ялув бацIаву, агьалинал хъус ядаву ва м.ц.
Журналистурал суаллахьхьун жавабру дуллай, М. Баачиловлул бувсунни хIакьинусса кьини 97% дузалну бушиву цивппа зузалтрал. Ттуршвагу процентрал дузалшинна дакъашиву ванал бувчIин бунни чIун дирсса аьралитал структуралува лаглай бушиврийну ва миннал кIанай зунми язи бугьлан багьлай бушиврийну. Гьарица подразделениялул дур цалла резерв. СОБР-ал – 15-20 инсан, ОМОН-лул – 200-250 инсан.

— ЖучIан кьамул байссар так аьралуннаву къуллугъ буллай бивкIсса жагьилтал. Январь зуруя шихунай жучIан зун ччай увкIунни 60-ксса инсан. Миннава так ца инсаннаща, цувагу Виваллил иширттал министерствалия увкIсса, бювхъунни физкультуралул нормативрду биттур дан. ХIаписартурал къуллугърайн жу хьхьичIва-хьхьичI буцлай буру жуламинная, — тIий ур М. Баачилов.
Ванал бувсунни мукунма республикалий Юстициялул ва Виваллил иширттал министерстварттал цачIу буллалисса «Оружие – выкуп» операциялувух цала зузалтгу гьуртту шайшиву.

Ярагъуннищалсса къачагътурал хIакъиравусса журналистурал суалданун жаваб дуллай, ванал бувсунни цIанасса чIумал республикалий чялиш бувксса къачагътал бакъашиву, амма миннал чул бувгьуми уттигу бушиву. Му бакъассагу, 1300-нная ливчусса дагъусттанлувтал Сириянал аьрщарай бушиву. Миннал, зана хьурча, региондалийсса тагьар оьлукъин дан бюхъайшиву.