Апанни Къапиев дунияллийн увккун 110 шинал юбилейран хас дурсса мероприятиярттал лагрулий Лакрал театрданул ккаккан бунни ванал аьрали чичрурду гьануну ларсун сакин бувсса «Духкъалагайсса макь» тIисса спектакль. Мунил режиссерну ур Ислам Казиев.
Зулайхат Тахакьаева
Спектакль байбишин хьхьичI Апанни Къапиевлул творчествалия ва мунал Дагъусттаннал литературалуву бувгьусса кIанттуя бувсунни Дагъусттаннал Чичултрал союзрал хъунама МахIаммад АхIмадовлул.
1934 шинал итабавкьусса «Дагъусттаннал лириктал» тIисса антология хьхьичIунсса шаэртурал итталун багьну бур. Шаэртурал цIарду кIурчIулттувух дуккан дайсса Мондельштамлул га антологиялия увкуну бур: «Къапиевлул таржумарттайхчин ттун кIул хьуссар дагъусттаннал шеърилул экьинанисса пасихIшиву», — куну.
Хъунасса палангнал чичу Луи Арагоннул 1958 шинал итабавкьусса дунияллул чичултрал хавардал антологиялувун бувтун бур Къапиевлул «Вечер» тIисса новелла.
ЦIанихсса кинорежиссер Андрей Тарковскийл увкуну бур, кинофильмардал ялув зузисса чIумал, на мудан Къапиевлул аьрали чичрурду канил дугьайссия куну.
ЦIанихсса кинорежиссер Никита Михалковгу ттигъанну кIицI лаглай ия, цайнма ца яла гужну асар биян бувсса чичрурдуну Къапиевлул дяъвилийсса чичрурду хьуссар, тIий.
Чичул оьрмулул ххуллия бусласисса цила ихтилатраву Гулизар Султановал кIицI лавгуна Апанни Къапиевлул цIа театрданун багьавай ва хIалалну дирзун душиву.
— Жагьилсса чичул Лакрал театрданущал хIала-гьурттушиву хъуннасса дуссия. Таржума бувссар тай шиннардий бихьлай бивкIсса чIявусса пьесарду. Сакин дуллай ивкIссар концертирттансса программарду. ХьхьичIва-хьхьичI 1934 шинал итабавкьусса «Дагъусттаннал альманахравун» бувтссар дагъусттаннал цалчинсса пьеса – Гьарун Саэдовлул «Къалайчитал», къалайчитал царив бусласисса хьхьичIмахъгу чивчуну, — кунни Султановал.
ЧIявуми тамашачитуран спектакль цимилвагу ккаклай бухьурчагу, дяъвилул хIакьмур жула янил хьхьичI бацIан банну роллу дургьусса актертурал тIуркIулул цIунилгу иттав дучIан дуллай дия Апанни Къапиевлул духкъалагайсса макь.
