ДР-лул Россельхознадзорданул управлениялул ветеринар инспектортурал Аьрасатнал ва Азирбижаннал дазуйсса «Ярагъ-Кказмаляр» пунктрай бувгьуну бур ихтияр дакъа Аьрасатнавун бувцуну нанисса 49 хьхьи.

Дазуй «Chery Flagcloud» маркалул автомобиль ххал бивгьуну, шиву лявкъуну бур, ветеринариялул чулухасса документру щаллу къабувну, бувцуну нани­сса хьхьиру. Машиналул заллу ур дуснан бахшишран лавсун най уссияв тIий.

Лелуххантрая инсантурайн ва хIайвантрайн нигьачIийсса азарду лахъайсса душиврийн бувну, хIукму бувну буссар дазул кьатIату лелуххант, ихтияр дакъанура, бувцуну букIлан къабитансса.
Хьхьируннащалсса инсаннал хIакъираву, ветеринариялул ва санитариялул кьараллу къадуруччаврийн бувну, сакин бувну бур АьФ-лул КоАП 10.8-мур статьялул 1-мур бутIуйн бувсса протокол.
Лелуххантгу зана бивтун бур Азирбижаннал республикалийн.