Зул бучIантIимур зула канихьри бусса

[dropcap]Ф[/dropcap]евраль зурул 25-нний МахIачкъалалий, Дусшиврул къатраву, шадлугърал даражалий дайдирхьунни «Жагьилсса пишакартурал» (WorldSkills Russia) региондалул мукьилчинмур чемпионатрал даву.

Имара Саидова
Пишардан хасъсса костюмирттаву сахIналий ккаккан дунни миллатирттал ва уттизаманнул къавтIавуртту, мукунна захIматрал пишардал чемпионатрал тарихрая балжину бусласисса видео.

[dropcap]Ч[/dropcap]емпионатрал даву дайдихьлахьисса мажлис тIивтIунни ДР-лул ХIукуматрал председательнал цалчинма хъиривчу Анатолий Карибовлул.
«ХIакьинусса кьини жула республика мюхтажну дур ларайсса квалификация дусса пишакартурах. ЗахIматрал пишарду машгьур баву, гьунар бусса пишакартал аьлтту баву хъанахъиссар (WorldSkills Russia) чемпионатрал агьаммур мурадну. Жу сакин барду пишардал чемпионатрал даву хьхьичIуннай давриха зунсса республикалул министерствардал ва ведомствардал каялувчитурал дянивсса группа», — увкунни Карибовлул.

[dropcap]В[/dropcap]анал мукунма кIицI лавгунни ларгсса шинал 28 журалул пишардал усттаршиву ккаккан дуршиву ва гьашину 43 журалул пишардал дянивсса бяст-ччаллу най бушиву. Му бакъассагу, Анатолий Карибовлул бувсунни ва чемпионатрах хъуннасса къулагъас дуллай ушиву Аьрасатнал Президент Владимир Путин. КIицI лаганну, ларгсса шинал Европанаву хьусса чемпионатрай Аьрасатнал командалул бувгьушиву цалчинсса кIану.

«Чемпионатрай гьуртту хъана­хъи­миннал гихунмайсса оьрмулувусса каши-кьудрат хъун хъанахъиссар. Зула кIулшивурттайну ва бюхъулийну ххуйсса хIасиллу ккаккан даву бакъассагу, зуяту республикалул хьхьичIунсса предприятиярттай лайкьсса кIантту бугьансса пишакарталгу хъана­хъиссар. Вай бяст-ччаллая байбихьлахьи­ссару зула оьрмулул ххуллу. ХIасил, зула бучIантIимур зула канихьри бусса», — увкунни Анатолий Карибовлул.
Гьуртту хъанахъиминнан тIайлабацIу чIа тIутIисса ихтилат бувна «Жагьилсса пишакартурал» профессионал сообществардал ва зузалтрал кадрардал Агентствалул каялувчи Максим Дмитриевлул.

Мажлисрал ахирданий, Карибовлул ва Дмитриевлул шадлугърал даражалий чемпионатрал давугу дайдирхьуну, гьаз бунни WorldSkills Russia чемпионатрал ттугъ.
ЗахIматрал пишардал усттаршиву ккаккан дурну, ххув хьусса оьрчIру кьамул бувантIиссар Аьрасатнал ва жула региондалийсса хьхьичIунсса предприятиярттай зун.