Исрапиллул душ Батталова Сабират
Мартрал 1-нний, лахъисса хIаллай къашавайгу бивкIун, оьрмулул 90 шинаву жуятува личIи хьунни дяъвилул ва захIматрал ветеран, хIурмат лавайсса Исрапиллул душ Баталова Сабират.
Сабират бувну бур 1928 шинал ХьурукIрав къалайчинал кулпатраву. УрчIра шин оьрмулул къархьуну, ппугу армиялийн лавгун, мукьва оьрчIащал ливчIун бур кулпат. Сабиратлун багьну бур хъуниминнал къабансса захIматру буллан. Мунищала архIал ванил къуртал бувну бур ХьурукIуллал байбихьулул школа, хъирив – Гъумучиял дянивмур даражалул школа ва Дагъусттаннал учительтурал институт.
Физика-математикалул учительницану зий байбивхьуну бур Ххюлуссуннал школалий. ЧIал къавхьуну, ванил бюхъулул даража ялун личлай, хьуну бур Лакрал рай-ОНО-лул инспектор.
Инвалидну зана хьуну увкIсса ппугу чIал къавхьуну ивкIуну, муния махъ, Гьанжилив бувкIун, зун бивкIун бур Дагъусттаннал педагогикалул институтраву, Багъдуев Гьаруннул физикалул кафедралий. Физикалул кафедралийсса методикалул лабораториялул хъунмурчIинсса даву ванил хIарачатрайну щаллу дайсса диркIссар. Ва гьуртту шайссия гьарца факультетрай дайсса давривух. Сабират зий бивкIссар ва даврий цила оьрмулул 85 шин хьуннин.
СахIибулхайр дусса, дакI-аьмал хъинсса, гьарца даву хъинну сантирай дайсса, тIайлашиву ххирасса, дакI тIиртIусса, иминсса хъамитайпа, ванищал зий бивкIминнан, ва кIулминнан, ва факультетрай дуклай бивкIминнан дакIния къабуккантIиссар.
Сабират ахиратрал шаврил кьурчIишиву кIидачIлай, дакIнийхтунусса жижара буллай буру ванил ссихь ва гъан-маччаминнахь. Бунагьирттал аьпа баннав, гьав нурданул дуцIиннав, алжаннул ххари баннав.
ДГПУ-лул коллективрал чулуха
А. М. Магьдиев, Аь. Аь. ХIайдаев
Ххаллилсса педагог, оьрчIан ххирасса учительница
Парамазова Эльза Алексеевна
аьпалул шаврийн бувну, пашманшивугу кIидачIлай, дакIнийхтунусса жижара буллай буру арсурваврахь – Шихамирдухь, Сиражуттиннухь, Арсеннухь, махъсса гъан-маччаминнахь, Гъумучиял школалул коллективрахь.
Цил бунагьирттал аьпа баннав, рухI бигьаний дишиннав!
Эльза Алексеевнал цинявппагу учениктурал цIания:
Сулайман Мусаев, ХIажиаьли Мусаев, Кьурбан-МахIаммад Жидалаев, ХIасан-ХIусайн Камалов, Шяпи Макьаев, МахIаммад Усттаров, Мурад Оьмаров, Шалласу Шалласуев
