Р. ХIамзатовлул цIа­нийсса Национал библиотекалий хьунни ДР-лул Культуралул министерствалул коллегиялул батIаву.
Бадрижамал Аьлиева
Муний гьурттушинна дунни ДР-лул ХIукуматрал председательнал цалчинма хъиривчу Анатолий Карибовлул, ДР-лул Халкьуннал Мажлисрал комитетрал председательнал хъиривчу Анна Безруковал, мукунма цайминналгу.
БатIаву дайдишин хьхьичI республикалул культуралул зузалтран дуллунни бусравсса цIарду ва ларайсса наградартту. Миннавух бия къачансса лакгу, минная жу чичинну ялунсса номерданий.
Ихтилатру хьуна ларгсса шинал дуван бювхъуми ва гьашинумур шинал дуван аьркинми давурттаясса.

ДР-лул культуралул министр Зарема Буттаевал цилвамур ихтилат байбивхьуна Владимир Путиннул Федерал Мажлисрайнсса Рисалалия.
— Шяраваллавусса клуб­ру, культуралул къатри цIуну буван ва буми бакьин буван, Аьрасатнал мюрщи шагьрурдайсса культуралул центрдал давурттал чIарав бацIан 23 миллиард арцул итабакьинтIий бур. ПаччахIлугърал чулухасса укунсса чIарав бацIаврил итталун дагьансса дахханашивуртту дувантIиссар Аьрасатнал субъектирдай­сса культуралул идарарттал давриву, — увкунни министр­нал.

КIицI лавгунни жулла республикалийсса культуралул идарарттавасса сайки бачIи ххишалагу мюхтажну бушиву капитал ремонтрах, бувсунни ва шинал Оьргърал ва Баршамайннал шяраву дувантIишиву Культуралул къатри, Гарайхановуллал, Ороталлал, ЧIухърал, Киша шяраваллал культуралул къатраву дувантIишиву капитал ремонт. Бувсунни ларгсса шинал щаллу дуван бювхъусса хъунисса проектирдая, цайми-цайми давурттая.

Республикалий хIа­кьинусса кьини зий бур культуралул 965 идара, миннул гьанулийгу зий бур сайки 500-ннийн бивсса творчествалул коллективру, халкьуннал театрду. Ларгсса шинал Буйнакскаллал, Къаяккантуллал, Нугъайнал, Хасавюртуллал районнай ва Южносухокумск шагьрулий тIивтIуну бур цIусса кинозаллу.
Ихтилатру мукунма бунни Анатолий Карибовлул, культуралул министрнал хъиривчу Мурад ХIажиевлул ва м.ц.