[dropcap]Ф[/dropcap]евральданул 25-нний ДР-лул ХIукуматрал председатель Артем Здуновлул каялувшиврий хьунни дуккаврил объектру (школартту, садикру) баврил бутIуву цIусса технологияртту ишла даврил масъала ххал бигьлагьисса батIаву.
ХIукуматрал каялувчинал тIимунийну, дуккаврил идарартту, кванториумру байни, цIусса технологияртту ишла дуллай бур. Школартту модульданул технологиялий баврил хIакъираву премьер-министрнал бувсунни му технология циняв кIанттурдай ишла дуллан къахьунтIишиву. Амма мукунсса журалий бувсса школартту лап ххуйсса, цIакьсса бикIайшиву.
ДР-лул строительствалул ва тIювалул коммунал хозяйствалул министр Малик Багълиевлул бувсунни цала ведомствалул дурсса анализрал хIасиллая. Муний гьартану ккаккан бувну бур социал объектру дуллалийни ишла дайсса технологиярттал хъинми ва къахъинми кIанттурду.
Артем Здуновлул тIимунийну, микку зун аьркинссар Дагъусттаннал пишакартал, аьркин багьарча, миннан лахьхьин бангу аьркинссар модульданул технологиялул объектру дуллан.
ДР-лул архитектуралул ва градостроительствалул комитетрал председатель Назир ХIусайновлул бувсунни цIусса технологиярттай оьрчIал багъру баврил хIакъираву.
Модульданул технология ишла дурну къатри даврил хIакъираву ихтилат бунни мукунма «Люминарий» центрданул директор Камил МахIаммадовлул. Мунал тIимунийну, чIирисса шяраваллаву бучIиссар буван комплексрал центрду, мивун буххайссар оьрчIал багъ, ФАП, школа, аьмсса атриум, оьрчIансса спортзал, библиотека, Культуралул къатта, «Люминарий» центр.
БатIаврий гьуртту хьунни ДР-лул ХIукуматрал председательнал 1-ма хъиривчу ХIажимахIаммад ХIусайнов, ДР-лул ХIукуматрал председательнал хъиривчу – дуккаврил ва элмулул министр Уммупазил Оьмарова, вице-премьер Владимир Лемешко ва цаймигу.
ХIадур бувссар
ХI. Аьдиловлул
