Вин ххуллухъин, кьурукIий!

«Масленицалул» байран МахIачкъалалив

МахIачкъалалив, Республикалул Халкьуннал творчествалул къатлул сакиншиндарайну, хьунни «Масленица» байран. Гьашину ва жулла республикалий 16-чинни хъанахъисса.

Бадрижамал Аьлиева
М. Горькийл цIанийсса Оьрус­нал театрданул хьхьичI сакин дурну дия ххюлтIукардал ярмукIа, миккува хьунни личIи-личIисса бяст-ччаллугу. Муния махъ цинявппагу бувххунни театрданувун. ЖанахIравун бувхми оьруснал халкьуннал нахIу-нацIушивурттайну, балайрдайну ва къавтIавурттайну, оьруснал халкьуннал аьдатру, канил пишарду ккаккан буллалисса программалийну хьунабакьлай бия республикалул творчествалул коллективирттал гьурттучитал.
Оьруснал театрданул Хъунмур залданул сахIналий ккаккан дунни «Масленицалул ярмукIа» тIисса цIанилусса байрандалул хъуннасса программа. Байрандалий гьурттушинна дунни МахIачкъала, Къизлар, ДагОгни, Избербаш, Хасавюрт шагьрурдаясса, Къизлардал ва Тарумовкаллал районнаясса коллективирттал.

Му кьинисса бусравсса хъамаллуравух бия ДР-лул культуралул министр Зарема Буттаева, Республикалул Халкьуннал творчествалул къатлул директор Марита МухIадова, ДР-лул миллатрал политикалул ва диннал иширттал министр Татьяна Гамалей, МахIачкъала шагьрулул Культуралул управлениялул начальник Фарид Абалаев.