Жул ЧIурттащиял шяравасса ца цIанихсса тухумраясса АьвдулхIалинхъал Юсуплул цала шамагу арс оьрус мазрай дуккин бансса хIарачат бувну бур тай архсса шиннардийва.
Гъалгъамур цалсса ХIажиев МахIаммад Юсуплул арснаяр.

МахIаммад увссар 1898-ку шинал ЧIурттащиял шяраву, 1916-ку шинал бувккуну бур Гъумуксса гимназия. Дуккаврих гъира бусса МахIаммад увхссар Москавливсса Темирязевлул цIанийхсса академиялувун, 1934-кусса шинал къуртал бувссар 2 шинал курсру ва ларсъссар накIлил ва дикIул промышленностьрал инженер-технологнал цIа. Та чIумал Дагъусттаннай му пишалий дурккусса хъинну чансса бакъа къабивкIссар. Жагьилсса пишакар тIайла увкссар зунттал районнай накIлия дай­сса сурсатрал заводру бан. Мунаща бювхъуссар, Лакрал, Ккуллал ва цаппара цайми районнай мукунсса заводру чIумуяргу хьхьичI бугу- бувну, зузигу бан ва микку зунсса зузалтрангу накIлил затирттаха зун лахьхьин бан.

МахIаммад 1940-ку шинал увцуссар зун МахIачкъалалив, дикIул ва накIлил промышленностьрал управлениялийн. 1942 шинал муная хьуссар нагь дай заводрал директор. Му чIумал мунийн «Маслопром» учай­сса бивкIссар. Най бивкIссар Хъунмасса Буттал кIанттул цIанийсса дяъви. Уттир багьсса МахIаммадлун цала усттаршиву ва цайва бивхьусса бурж лавай­сса даражалий щаллу байсса пишакар ушиву чIалачIи бан.
Дяъви наниссаксса хIаллай, фронтрансса накIлия дурксса продукция цала-цала чIумал щаллу дуллай, ванал каялувшиндарайсса маслозавод жула республикалий хьхьичI хху­ттай бивкIссар. Ва ишираву МахIаммадлул хIалал дурссар «ХIурматрал лишандалул» орден ва чIярусса медаллу.

1946-ку шинал МахIаммадлуя хьуссар Дагъусттаннал дикIул ва накIлил промышленностьрал хъунама технолог. Яла махъсса шиннардий цала кулпат ва оьрчI-бакI ялапар хъанахъисса Буйнакск шагьрулий хъунама технологну зун ивкIссар. Щала оьрму МахIаммадлул цалла дакIнил ларсъсса даврий зий гьан бувссар. Ванаща бювхъуссар цала оьрчI-бакI дуккин бан, даврил ва яшаврил ххуллу-ххуттайн бичин.

МахIаммадлул чулуха хъунмасса ка-кумаг бавугу диркIссар зунттавусса цала щарних – ЧIурттащиях. Къутаннайн зун нанисса колхозниктурангу, фронтрая шаппайн нанисса фронтовиктурангу бацIансса кIанттулссагу, дуканмунил щаллушиндаралссагу мунал байсса бивкIссар тай гьарцагу чулуха захIматсса шиннардий.
Вана укунсса ивкIссар жул шяравучу ХIажиев МахIаммад Юсуплул арс. Аьпалухьхьун лавгссар 1976-кусса шинал.
ХIусайн Давыдов,
ш. ЧIурттащи