Буттал миналуцIа хьун дурссар 24 шяравалу

ЦачIун бавтIсса бярнихи. 1972 ш.

[dropcap]Б[/dropcap]ярнихиял шяравалу диркIссар Ккуллал райондалул аьрщарай, Ваччату мукьра ккилометралул манзилданий,

 Щунудагъ-Зунттул кьиблалул чулий, 1-мур ЦIувкIрав нанисса ххуллул урчIах. Мунил чIаххуврайсса шяраваллуну диркIссар Къичурлухи, Чакъали ва Тукъатул.


Тарихрал тIимунийн бувну, Бярнихиял шяраваллил гьану бивзун бивкIун бур ЧIяйннал шяраватусса агьлулул XVIII ттуршукулул дянивсса шиннардий.
Щар салкьи хьусса кIанттул чIарав ччясса шиннардия шинмайва бивкIун бур дянивсса лагрулул бяр. Мунийн бувну шяраваллил цIагу му бярницIун дархIусса дикIан багьлай бур.
Шяраваллил жямат хъунмурчIин сакин хьусса бивкIун бур укунсса тухумирттая: Татарханхъул, Айжалихъул, МахIмудхъул, ХIусайнхъул, ХIасанхъул, Ттугъчихъул, ТIиринхъул, Аьйшахъул, Аьдахъул, Ибайхъул.

ХIасан МахIаммадов (урчIах)

Аьрасатнал тарихраву Георгиевлул мукьвагу ххачлил кавалершиврул цIа ларсъсса цалчинсса бусурманчуну хьуну ур Бярнихиял шяраватусса инсан – Ттугъчи Рамазан. Лавсунгу бур мунал ми ххачру 1877-1878 шиннардийсса Туркнащалсса дяъвилий.
Колхоз сакин дурну диркIун дур 1936-ку шинал. Му сакин даврил яла хьхьичIунма активистнугу хьуну ур Къаранов Аьвдуллагь. Мира шиннардий (1932-1937) му зий ивкIун ур шанна шяраваллил школарттал директорнугу – ЧIяв, 1-мур ЦIувкIрав ва СумбатIлив.

Хъунмасса Буттал кIанттул цIанийсса дяъвилийн 54 къатта бусса Бярнихиял шяравату лавгун ур 41 инсан. Махъунмай зана хьуну бур анжагъ бачIи.
1944-кусса шинал, Лаккуя бизан бувну махъ, Бярнихиял ва чIаххуврай диркIсса Къичурлухиял, Чакъаллал, Тукъатуллал, Оьллаурттиял ва Хъусрал-ЧIарттал жяматру цачIун хьуну бивкIссар ца кIанттай – Кишенаул тIисса шяраву ва муния махъ му шяраваллин цIагу дирзун диркIссар цамур – Чапаево. Мура цIанилусса шяравалу хIакьину салкьи хъанай дуссар цIусса миналийгу – Новостройрай.