[dropcap]М[/dropcap]артрал 11-нния байбивхьуну 22-ннийн бияннин республикалий най дикIантIиссар Щалагу Аьрасатнаву баян бувсса «Баян бува бивкIу бахлахисса кIанттул цIа» тIисса наркотикирттайн къаршисса акция.

Акциялул мурад бур наркотик­ру закондалуцIун къабавкьуну ишакаш буллалисса иширттайн къарши бацIаврил давурттавух, мукунма наркотикирттахун багьми хъин баврил ва реабилитациялул давурттавух жяматрал гьур­ттушинна даву, наркотикру ппив буллалими ашкара баву, бавсса информациялул хъирив лаяву. Вай масъаларттацIун дархIусса давурттайн кIункIу бантIиссар республикалул хасъсса министерстварттал ва ведомстварттал пишакартал.

Наркотикру закондалул хху­ттава бувккун ишакаш буллалисса ишру ялун личин бан ва миннун ххуллу кьукьин полициялул зузалтрацIун кабакьу бан ччиминнаща оьвчин бюхъайссар виваллил иширттал органнайн 102 телефондалийн, бучIиссар ДР-лул МВД-лул сайтрайн чичингу.
ДР-лул МВД-лул наркотикру ишакаш баврил ялув бацIаву дуллалисса управлениялул баян буллай бур: наркотикирттал лиллай бур кулпатру, миннухун агьсса инсаннаща цала гъанминнаха аякьа дан, оьрчIру тарбия бан хъанай бакъар. Наркотикирттал къуркъа буллай бур инсаннал бюхъу-тяхъа. Миннан захIматну бур дуклан ва зун. Наркотикир­ттал къухъна дуллай дур инсаннал память, лиллай бур нярал клеткарду, ми сававну инсаннай личIи-личIисса азарду сукку хъанай дур: шизофрения, аькьлулул ссуссукьушиву, гепатит, СПИД, гьутру-ттиликIрал, къюкIлил, нервардал азарду. Цуми наркотикру ва цукун ишла буллай бухьурчагу, ахир ца дур. Наркотикру ишла буллалисса инсанная бизлай бур сагъ бакъасса оьрчIру, цаппара наркотикирттал баххана буллай бур инсаннал генетикалул код. Наркотикру ишла бувсса инсаннан апатIру чIявуну хъанай бур. ЛичIлулшиву, хъит-шит чан хьусса, ми сававну ххуллурдай ДТП-тту хъанай дур. Ва бакъа­ссагу, давурттай, ичIувагу вайннан цIунцIияртту хъанай дур, вай сававну цайминнал оьрмурдан ва цIуллу-сагъшиврунгу нигьачIисса тагьар хIасул хъанай дур.

ДакIний битияра!
Закондалул ххуттава був­ккун наркотикру ишакаш баврицIун дархIусса тахсиркаршивуртту ва тIулдакъашивуртту дурми административ ва уголов жавабрайн кIункIу байссар.
Статья 6.9.
Наркотикру ягу психотроп зат­ру, хIакиннал ккаккан къадурнура, ишла дурну духьурча, 4 азарунния 5 азаруннийн дияннинсса аьчIа дишайссар ягу 15 гьантлий дуснакь айссар.
Статья 228.1.
ЗакондалуцIун къабавкьуну наркотикру, психотропный затру ва миннул аналогру буллалисса, бахлахисса, ца кIаная ца кIанайн тIайла буклакисса, мукунма наркотикру ва психотроп затру дусса ххяххия дахлахисса ва ца кIаная ца кIанайн тIайла дуклакисса инсан дуснакь айссар 4 шиная тIайла хьуну, оьр­мулухунсса чIумуйсса.
Балики зунма наркотикру ва психотропный затру ишла буллалисса ва ппив буллалисса иширттая кIулну бухьурча, баян бувара хасъсса къуллугъирттайн. Мунийну зу щил-бунугу оьрму ххассал бувантIиссар.
Дагъусттаннал МВД-лул наркотикру закондалуцIун къабавкьуну ишакаш буллалисса иширттал хъирив лаяйсса управлениялул вихшалдарал телефон: 8(8722) 64-12-16.
ДР-лул Виваллил иширттал министерство
ХIадур бувссар
Андриана Аьбдуллаевал