[dropcap]О[/dropcap]ьруснал театрдануву лайкьсса даражалий хьунни Аьрасатнал магьирлугърал лайкь хьусса ишккакку, ДР-лул паччахIлугърал премиялул лауреат, профессор Рамазан ХIажиевлун 75 шин там шаврил юбилейран хас бувсса аьпалул мажлис.

ЦIанихсса дирижер ва музыкант Рамазан ХIажиев увну ур Ваччиял шяраву. Ма­хIачкъалаллал музыкалул училищалул хорданул дирижер шайсса отделениялия махъ къуртал бувну бур Л. Собиновлул цIанийсса Саратовуллал паччахIлугърал консерватория. Зий ивкIун ур МахIачкъалаллал музыкалул учи­­лищалий, хорданул дарсру дихьлай. 1981 шиная шихунай – Дагъусттаннал паччахIлугърал радиокомитетрал дирижер ва каялувчи.
2004 шинал Дагъусттаннал ГТРК-лул хор ппив хьуну, Рамазан ХIажиевлул хъунмасса захIмат бивхьуссар му цIудуккан дан.
Ванал хIарачатрацIух тIив­тIуну бур 2000 шинал Дагъус­ттаннай Опералул ва балетрал театр. Зий ивкIун ур хьхьичI дирижерну, яла – хъунама дирижерну ва каялувчину. Ванал каялувшиндаралу чулийн бувккун бур Да­гъусттаннай оьрчIансса цалчинсса опера «Красная шапочка» (В. Гокиели), цалчинсса классикалул опера «Алеко» (С. Рахманиновлул), оперетта «Аршин Мал Алан» (У. ХIажибековлул).
Республикалул культура хьхьичIуннай дан 46 шинал манзилданий бувсса захIматрахлу лайкь хьуну ур чIярусса наградарттан.

ЦIанихсса музыкант, дирижер дакIнийн утан бувкIун бия республикалул магьирлугърал ишккаккулт, даврил уртакьтал, учениктал, гьалмахтал ва гъан-маччами. Бусравсса хъамаллуравух бия республикалул культуралул министр Зарема Буттаева.
Мажлисрал сценарий хIадур бувну бия жагьилсса шаэр ва драматург Марат Шахмановлул. Байбихьулий ккаккан бувна музыкантнан хас бувсса видеоролик.

— Рамазан МахIаммадович ттулгу насихIатчия. ХIакьинусса кьинигу дакIний бур, арулла шинавусса оьрчIру дагъусттаннал, оьруснал ва европанал классиктурал произведениярттащал кIул буллай, цуксса гьавасрай магьирлугърахун машхул буллай бивкIссарув. Багьа бищун къабю­хъайсса захIмат бивхьуссар Рамазан МахIаммадовичлул Да­гъусттаннал магьирлугъ хьхьичIуннай дан. ХIадур бувссар хордануву балай тIунсса кадрарду, ГТРК-лул музыкалул фондран салкьи бувссар республикалул магьирлугърал ирс гьануну лавсъсса жула композитортурал произведенияртту. Мунал хIарачатрайну тIивтIуссар Дагъус­ттаннал паччахIлугърал опералул ва балетрал театр, — увкуна цила ихтилатраву Зарема Буттаевал.
Ккуллал райондалул администрациялул отделданул каялувчи Шамхал Хизриевлулгу дакIнийн бувтуна цана Рамазан ХIажиев цалчин ххал хьусса чIумул мутта.
— Ваччиял школалий ца байрандалун хас дурсса концерт хIадур дуллалисса чIумал, цала аьрххилий буттал шяравун увкIсса Рамазан ХIажиев репетициялийн увкIуна. Балай тIутIисса цала ссу бацIан бувну, ганал увкуна: «Ина му балай дакIнийхтуну тIий бакъара. Балай учавриву яла агьаммур чIу бакъар, балай чара бакъа дакIнивату нанисса бикIан аьркинссар».

[dropcap]М[/dropcap]аэстро дакIнийн утлати­сса ихтилатру ялагу бувна Да­гъусттаннал Композитортурал союзрал хъунама Рамазан Фаталиевлул, Дагъусттаннал Музыкантътурал союзрал хъунама Хан Башировлул, Аьрасатнал магьирлугърал лайкь хьусса ишккакку, композитор МахIаммад ХIусайновлул, Да­гъусттаннал филармониялул каялувчи Ирина Нахтигаллул, Рамазан ХIажиевлул шяравудуш, философиялул элмурдал доктор Асият Буттаевал, Дагъусттаннал ГТРК-лул вакилтурал.

Дагъусттаннал паччахI­лугърал опералул ва балетрал театрданул хорданул, М­а­хIач­къалаллал музыкалул училищалул хорданул, театрданул камерный ва симфониялул оркестрданул щаллу бувна да­гъусттаннал ва дунияллул классик­турал язими произведенияртту. ДайлиртIуна концерт музыкантнан цанмагу, хорданул солистурангу ца яла ххирасса, С. Прокофьевлул «Многая лета» произведениялийну.
Рамазан ХIажиевлул кулпат­рал Залмул ва душнил Каринал барчаллагь увкуна цала ххирасса инсаннал аьпалул мажлис хъун бан бувкIсса цинявннахьвагу.