Аьлтту хьунни тIайла дакъа ишла дуллай бивкIсса аьрщив

ДР-лул Россельхознадзорданул управлениялул госинспектортурал ирглий дуллалисса ххал бигьавурттал аьлтту бунни «Красный Октябрь» тIисса СПК-лул хозяйствалул аьрщив тIайла дакъа ишла дуллай бивкIшиву. СПК-лул ккаккан бувсса документирттайн бувну, вайннал шяраваллил хозяйствалул аьркиншиннардан ишла дуллай бу­сса бур 5 азарда гектар аьрщарал Бабаюртуллал, Буйнакскаллал, Гумбетуллал, Хасавюртуллал ва Казбекуллал районнай. Мукунма исват бунни, Хасавюртуллал райондалийсса ризкьилун кка­ккан дурсса аьрщарай «Новый Артлух» тIисса шяравалу дурну душиву. Ва шяраваллил дургьуну дур 70 гектар аьрщарал.

«Красный Октябрь» СПК-лул председательнал хъиривчу Анварбаг МахIаммадхIажиевлул бувсунни ва шяраву къатри дансса ихтияр дуллай байбивхьушиву 90-ку шиннардил байбихьулий, «Красный Октябрь» колхозрал собраниялий бувсса хIукмулийн бувну.

ХIакьинусса кьини ва къутандалий дур 100-хъул хозяйстварду. Шикку ялапар хъанахъисса инсантал дузал бувну бур ттукIрал, газрал ва щинал. Мукунма ва шяраву низамрайн бувцуну бур ххуллурду, дирзун дур кIичIирттан цIарду, бувну бур мизит, администрациялул идара. Аммарив цурда Артлух шяравалу, закондалийн бувну цIагу дирзун, кьамул дуллай бакъар.
Россельхознадзорданул управлениялул зузалтрал гихуннай дурсса ххал бигьавурттал аьлтту дунни ва кооперативрал Бабаюртуллал райондалий 350 гектар хъуруннал къадугьлай, цIинцIахьхьун гьан дурну душиву.

Ва аьрщи хьхьичIва ппиринж бугьан тIалав дурну диркIун дур, утти тIурча, шикку ххулув буллай, ятти-гъаттарал канаки дуллай бусса бур.
СПК-лул давриву аьлтту хьусса диялдакъашивурттал хIакъираву протоколлу бунни, АьФ-лул КоАП-рал 8.6-мур, 8.7-мур статьярттайн бувну ва кка­ккан дунни цаппара диялдакъашивуртту дукьан дансса чIун.
Мукунма, ванил хIакъи­равусса информациялул хъирив лаяву мурадрай, протокол тIайла бувккунни ДР-лул Аьрщарал ва имуществалул министерствалийн.

ХIадур бувссар
Имара Саидовал