Машгьурну бур захIматрал пишарду

Март зурул 2-нний ХIамзат ЦIадассал цIанийсса Яруссаннал музыкалул ва драмалул театрдануву хьунни WorldSkills Russia “ЗахIматрал пишакартал» тIисса региондалул IV-мур чемпионатрал даврил хIасиллу дуллалисса мажлис.

Имара Саидова
Шикку гьуртту хьунни ДР-лул ХIукуматрал председательнал 1-ма хъиривчу Анатолий Карибов, ХIукуматрал председательнал хъиривчу, ДР-лул кIулшивуртту дулаврил ва элмулул министр Уммупазил Оьма­рова, ДР-лул захIматрал ва социал лябуккулул министр Изумруд МухIуттинова, «Успех» тIисса республикалул жагьилтал давурттал щаллу баврил центрданул директор, WorldSkills Russia ва «Абилимпикс» чемпионатирттал координациялул центрданул каялувчи Шамил МахIаммадов ва цаймигу.
Мажлис тIитIлай, ххув хьуми барча буллалисса ихтилат бунни Анатолий Карибовлул.

— ХIакьину жува бавтIун буру чемпионатрал даврил хIасиллу дан. ЛичIи-личIисса регионная­сса чIявусса хъамал бучIаврийну хъиннура гьаз хьунни чемпионат­рал сий. ДакIнихтуну барчаллагь баян буллай ура пишардал усттаршиву ккаккан дуллалисса бяст-ччаллу лавайсса даражалий сакин баврихлу. Цал уттигу исват хьунни Дагъусттаннал кадрарду хьхьичIунмай баврийн чемпионатрал хъунмасса асар биян буллалишиву, — увкунни А. Карибовлул.

Хъирив бахшишру дуллунни бяст-ччаллаву хьхьичIунсса кIанттурду бувгьусса пишакартуран.
Жагьилтурал пишардал усттаршиврун кьимат бишлашисса ихтилат бунни Шамил МахIаммадовлул. Ванал кIицI лавгунни региондалийсса чемпионат лавайсса даражалий ларгшиву.

— Вай бяст-ччаллал тасттикь бунни жула республикалий захIмат ххирасса, гьунар бусса жагьилтал чансса бакъашиву. Гихунмайгу чялишну хIадур хъанантIиссару миллатирттал даражалийсса чемпионатрай хьхьичIунсса хIасиллу дан, — увкунни ванал.
ХьхьичIунсса кIанттурду бувгьуми ва цинявппагу гьуртту хьуми барча буллалисса ихтилат бунни Уммупазил Оьмаровалгу.
Гьурттучитурахь барчаллагь увкунни Изумруд МухIу­ттиновалгу.

— Цинявппагу гьуртту хьу­сса жагьилтураща бювхъунни, пишардугу язи бувгьуну, ус­ттаршиву ккаккан дан. Ялу-ялун машгьур хъанай най бур захIматрал пишарду. Гьуртту хъанахъиминнан чIа тIий буру захIматрал пишардахсса гъира-шавкь къалещаву. ХIарачат буллалиминначIанни барачатгу бучIайсса.
Мажлисрал ахирданий кка­ккан дунни дагъусттаннал машгьурсса артистътурал концертгу.