[dropcap]Ф[/dropcap]евраль зурул 5-нний Да­гъусттаннал Халкьуннал Мажлисрал председатель Хизри Шихсаидов бакIчисса делегация лавгунниГрознай шагьрулийнкIирагу республикалул дянивсса дазурду ккаккан даврил хIакъиравусса совещаниелий гьуртту хьун.

Имара Саидова
Дагъусттаннал чулухасса делегациялувух бия ДР-лул Халкьуннал Мажлисрал председательнал хъиривчу Камил Давдиев, ДР-лул ПаччахIлугърал председательнал хъиривчу, ДР-лул аьрщарал ва имуществалул иширттал министр Екатерина Толстикова, Республикалул экологиялул министр Набиюлла Къарачаев, ДР-лул Халкьуннал Мажлисрал  аграр политикалул ва тIабиаьт ишла даврил комитетрал председательнал хъиривчу Хазали Мисиев, районнал бакIчитал, Федерал управлениярттал паччахIлугърал, кадастровый ва картографиялул къуллу­гъирттал вакилтал, коммерческий  дакъасса идарарттал Координациялул советрал председатель Шамил Хадуллаев.

Цала ихтилатраву Чачаннал республикалул Парламентрал председатель МахIаммад Даудовлул кIицI лавгунни Аьрасатнал Президентнал АьФ-лул ПаччахIлугърал комиссиялул хьхьичI бивхьушиву кIирагу субъектрал дянивсса дазу рищаврил масъала цалийн бутаву.

БатIаврил дайдихьулий шадлугърал даражалий чирчунни Чачаннал Республикалул парламентрал ва  ДР-лул Халкьуннал Мажлисрал хIала-гьурттуну зунсса кьутIи. Муния махъ Дагъусттаннал парламентрал вице-спикер Хизри Шихсаидовлул кIицI лавгунни Чачаннал ва Дагъусттаннал дянив­сса дусшиву хъиннура цIакь хъанахъишиву.

— Дагъусттаннал ва Чачаннал дянив тачIав бакъавкьусса, пикрирду цалийн къабувкIсса ишру къавхьуссар. Ккаккан дурсса чIумуй жула хьхьичI хIукуматрал бивхьусса масъала щаллу бан хIарачат банну, — увкунни МахIаммад Даудовлул.

Республикарттал дазурдай­сса районнал бакIчитуран дазурду ккаккан даврил даву чялиш дуккан дан аьркиншиву бувсунни Хизри Шихсаидовлул.

Совещаниялул гьурттучитурал ххал диргьунни республикарттал дянивсса дазурдал картагу ва мукунна  дунни гихуннай дуллансса даврил плангу.

Администрациярттал районнал бакIчитуралгу цала ихтилатирттаву кIицI лавгунни чIаххуврайсса республикалул агьалинащал мудангу хIалану ва бавкьуну бивкIшиву. МахIаммад Даудовлул увкунни: «Жу республикарттал дянив дазурду ришлай бакъару, ми хьхьичIара ккаккан дурну диркIссар, утти тIурча, закондалул ххуллий тIайла дацIан дуллай буру», — куну.

Хъирив вице-спикер Хизри Шихсаидов бакIчисса Дагъусттаннал делегация  кьамул бунни Чачаннал Республикалул бакIчи Рамзан Кьадировлул.

КIирагу республикалул вакилтурал ххал бивгьунни регионнал дянивсса дазурду тIайла дацIан даврил хIакъиравусса масъалар­тту.

«Дагъусттаннал ва Чачаннал миллатирттал дянив цукунчIавсса щавщи багьансса чаран бакъа­ссар, кIивайнналвагу мурадру цану ккавккун, дузал бан аьркинссар ва масъалагу. ХIакьину ххал бивгьу­ссар Цасса паччахIлугърал реестерданий республикарттал дазурду ккаккан даврил масъала. Жу кьутIи дурссар аьрщарал масъалартту, региондалул даражалий бавкьуну, дузал дуллансса. Укунсса давуртту дуллай буссар щала билаятрай», — увкунни Рамзан Кьадировлул.