Дусшиврул ламурду цIакьссар

Вероника Фатеева

Ларгсса хамискьини, дакIний-мазрайвагу бакъанма, жул редакциялийн ччя-ччяни уххай-уккайсса журналист

 ва «Горцы» литературалул кказитрал редактор Марат ХIажиевлул оьвкуну, Поэзиялул театрдануву ттунна хъинну тIааьн дирзсса фотовыставкалийн багьра. Ва сакин дурну дия Маратлущал  дусшиву дусса, Красноярскалиясса фотохудожник ва журналист Вероника Фатеевал давур­ттан ва ванил лас, шаэр-музыкант, Георгий Арустаманьяннул творчествалун хасну.

Залму АьбдурахIманова
Вероника ва Георгий цалчин жулла республикалийн бувкIун бивкIссар ларгсса шинал сентябрьданий хьусса «Тарки-Тау» тIисса луттирдал выставкалийн. Гикку фотохудожникнал  цаппара фотосуратру тамашачитурал итталун дагьну, миннухсса гъира бувчIусса ванил  дустуран пикри хьуну бур Вероника ва ванил лас Георгий цIунилгу выставкалийн дуккан дансса суратирттащал ва шеърирдащал жучIанма бучIан бан. Выставкалул  щалла сакиншиннагу Дагъусттаннайсса дустурал цала  бакIрайн ларсун дур.

Мяйжаннугу, Вероникал гьарцагу фотосурат дия щалла цила дакI дирхьуну, цивува бусса гьунаргу, бюхъугу ишла бувну рирщусса.
Фотосуратрал творчествалул корифей Камил Чутуевлулгу цала мукъуву кIицI бувна Вероникал сурат рищайни ишла дурсса макро­съемка ва аралуву зузиминнал чIяруну ишла къадайшиву ва  ишла дурмагу  хъуннасса усттаршивугу, пагьмугу бусса фотохудожникнан кка­ллишиву.
«Шивун ухханнина, архниятува итталун дагьлагьисса вай суратирттал цирив ца тIилисин бутлай бур дакIнивун. Дазу-зума дяйкьусса кунна, цирив ца гьарта-гьарзашиву  хIасул хьуну   дур суратру лархъсса залданувугу. Ва жанрданул инсаннал дакIнивун цирив-ца ттюнгъашиву ва гъилишиву рутлай дур», — кунни Камиллул.
Вероникалгу, шиккун бувкIсса цинявннахь дакIнийхтунусса барчаллагь  тIий, кIицI бувна, архсса ва бявкъусса Красноярскалий чIивиний ялапар хъанай бивкIсса  цинма цалчин Да­гъусттанная бавну ва ккавккун бивкIшиву  буттал библиотекалува­сса «Кубачи» тIисса луттирая.

Ванил ппу зий усса ур га шагьрулий итабакьлакьисса кказитрал хъунама редакторну. Оьрмулул ва чIумул утти бувцуну бур ва цила оьрчIнийва хIасул хьусса, Дагъусттаннайн биян ччисса хиялданучIан.
«Ттуву цIубакIрай, цукун хьунавав ттула выставка, цукун зул халкьуннал кьамул данавав ттула давуртту тIисса, сикъавсусса пикрирду чансса бакъая. Зул дакIурдил гъилишиву щуркIал хъанахъиссаксса, щак-щукругу лавгун, сивсунна ва давривух гьуртту хьун. Барчаллагь зун хъунмасса! Мудангу ялугьланну Дагъусттаннай хъанахъисса культуралул батIавурттайн жуйнмагу оьвчиннин!» — увкуна ванил.

БатIаву хъиннура чIюлу дурна цала назмурдайну ва гитаралухун­сса балайрдайну Георгийлгу.
Выставкалул ахирданий, циняв цачIусса суратгу рирщуну, хъамал тIайла бувккуна Москавлив­сса самолетрайн ва махъгу лавсуна вайнная Дагъусттаннайнсса аьр­ххирдансса чIун вания гихуннайгу ля­къин. Гайнналгу махъ буллуна уттимур аьрххи хас бан жулла республикалул зунттал щархъан ва тIабиаьтран.