Жун, зунттаву Ккуллал райондалий яхъанахъисса инсантуран, чIявуну хIакинтурачIан буххан багьлан бикIай. Шяраваллаву инсаннал циняв базурдал хIакинтал бакъахьувкун,
жу лагару Ваччавсса райондалул азарханалийн ва поликлиникалийн. Махъсса шиннардий янилун дагьлан диркIунни азарханардайсса лазилакьавуртту, палатарттавусса марцIшиву, пар-пар тIисса хялатирттавусса хIакинтал ва медсестрахъул. ХIатта симаннугума цайми хьуну дур.
Хъинну ххуйсса ремонт дурну дур хирургиялул отделениялий. Ва ремонт хъисгу яларайсса дакъар шагьрулийсса азарханарттаймурнияр. Дуллай бур ремонт вайми отделениярттайгу. Гьай-гьай, вай ххуй-ххуйсса дахханашивуртту хъанахъаврил сававчину хIисав хъанай ур азарханалул хъунама хIакин Сиражуттиннул арс Сулайманов Сулайман. Райондалул азарханалий зузисса хIакинтуралгу, шяраваллавусса ФАП-ирдайсса зузалтралгу къашайшалал чулийнмайсса бургаву цIимилийсса ва хIурматрайсса хьуну дур.
[dropcap]С[/dropcap]улайман цувагу Аллагьнала буллуссапагьмулул хIакин ур. «ХIакиннащал ихтилат буллалийни, къашайшалал цIуцIаву лагь къахъанарча, га хIакин акъар». Вай махъру куну бур ччянива хъунасса аькьлукарнал. Махъ бакъа, вай бавкьуну бур хIакин Сулайман Сулаймановлул хасиятрацIунгу. ХIатта ва на утти тIутIимур аьжаивну чIаларчагу, на палаталува шавай ачара хIайп тIийнува.
Ттула кутIасса мукъул ахирданий чIа тIий ура Ккуллал райондалул жяматрал цIуллушиврул ялув бавцIусса инсантуран цаннагу цIуллушиву ва цала-цала къушлий нахIу-хIалимшиву.
АьвдулхIалин АьвдулхIалимов,
ш. Ссухъиящи
