«Ттувун мунил хъунмасса ццах бувтунни»

«Smeet»  тIисса инсан итххяххан аврил  Центр­даний (Центр личностного роста) хьунни лакку мазран хас дурсса батIаву.

Андриана Аьбдуллаева
Ва ЦIуйшиял шяравасса Смит Расуловлул Центрди. Лак­ран чIявучин ва цIа бавну, кIулну дикIантIиссар. Центр зий 8 шин хьуну дур. Ва чIумул дянив шикку кIулшивуртту ларсун дур 3 азарунния ливчусса инсантурал. Центрданий буссар личIи-личIисса курсру, лахьхьин бай­ссар усттарну ихтилат бан, инсантурал хьхьичI сивсуну гъалгъа тIун (ораторское искусство), ингилис мазрай гъалгъа тIун ва м.ц.   Уттирив, хIакьинусса жагьи-жугьултран цала ниттил маз ишлану бакъашиву, ялун нанисса никиран му кIулну бакъашиву чIалай, му буруччаву мурадрай, миллатгу, мазгу ххирасса жагьилнан пикри хьунни цала Центрданий лакрал клуб тIитIин, лакку мазрал курсру бачин бан, чIумуя чIумуйн шиккун мазраха зузисса пишакартурайн оьвтIун, жула ниттил маз ябан­сса чаранну ляхълан.

Лакку мазран хас дурсса батIаврий гьуртту хьунни экономикалул элмурдал доктор Шарип Шарипов, географиялул элмурдал доктор Шагьимардан Мудуев, ДР-лул жагьилтурал иширттал министр Камил Саидов, Халкьуннал Мажлисрал депутат Амирхан Амирханов, МахIачкъалаллал Кировский райондалул бакIчи СалихI Сагидов, машгьурсса спортсмен  Хучбар Хачилаев, МахIачкъалаллал 16-мур школалий лакку мазрал дарсру дихьлахьисса ПатIимат Аьлиева, Каспийскаллал Аьра­сатнал халкьуннал аслийсса культуралул центрданул хъунмур Башикар Вагьабова, Вихьуллал шяравасса Ися Аьбдуллаев ва м.ц. ЛичIи-личIисса шяраваллавасса, шагьрурдаясса, хIатта Москавлия бувкIссагума, 120-ннийн бивсса инсантал.

Мажлис тIитIлай, ихтилат бунни батIаврил сиптачи Смит Расуловлул.

— На гъалгъа тIисса чIумал, ттухь мудан бикIайва лакрал лугъат бур вил тIий. Лугъат бакъа оьрус мазрай гъалгъа тIун лахьлай, шавагу, гьар кIанайгу оьрус мазрай гъалгъа тIий, ттула ялув ацIлай уссияв. Ттунмавагу къакIулну, лакку маз хъамабитлай, къухъна хъанай лявкъунни. Му  иширал ттувун хъунмасса ццах багьан бунни. Шаппасса цинявннахь  учав, жува шаппа так лакку мазрай гъалгъа тIунну куну.Ттун хIисав хъанан бивкIунни лакрал жагьи-жугьулт цала мазрай гъалгъа тIий бакъашиву, чIявуминнал маз къухънану, хIатта кIувагума  къакIулну бушиву, хIасил, мазрал масъала жучIава леххаву рутан багьлагьисса даражалий бушиву. Ва иширал на бакIрай ацIан унна маз ябаврил проект щурущи дан. Мунил ялув пикри буллалийни, гьаз хьунни цамургу масъала – чIирисса чIумул дянив маз лахьхьаврил методика ххал дигьаву. Жула маз бухкъалаган буруккинттарайсса, дакI цIуцIисса чIявусса  инсантал бур, ттучIарив ми батIлансса, гъалгъа тIутIи бансса, маслихIат ккаклансса майдан бур. Пикри хьунни  нюжмардий цал лак батIайсса, лакку мазрай гъалгъа тIунсса клуб тIитIин. Шивун ххуллу тIивтIуссар гьарцагу лаккучунан. Шиккун батIлай, жува жула ниттил маз ябансса чаран лякъин аьркинссар, — кунни Смитлул.

Миллатрал чувшиврул тарихрая, жула мазгу, аьдатругу дуруччаву  мурадрай дан багьлагьисса давурттаясса ихтилатру бунни хъамаллуралгу.

— На ххарину ура хIакьину шиккун вайксса инсантал бучIаврия, шикку чIявусса жагьилтал бушиврия. ДакI ххари хъанай  дур жагьилсса оьрчIан ва ххаллилсса даву дан пикри шаврия. Миллатрал цIаний дуллалисса даврияр бусравсса цичIар дакъассар. Хъиндайдихьу хьуннав, тIайлабацIу баннав тIий ура, — увкунни Шарип Шариповлул.

Официальнаймур бутIа къуртал хьуну махъ, ккура-ккуранну дурну, ялагу маз буруччин­сса чаранная ихтилатру буллай, маслихIатру ккаклай бия мажлисрайн бувкIми.