Авгъан дяъви байлитIаврил нюжмар

Библиотекалувусса мажлисрал гьурттучитал

СССР-данул армиялул каялувчину ивкIсса генерал Громовлул увкуссар: «Ттуяр махъ Авгъаннаву СССР-данул цаягу саллатI къаливчIссар», — куну. Ларгунни ганияр махъ 30 шин.

Та дяъвилул цIараву жанну кьурван дурссар ацIазарунная ливчу­сса жагьилтурал. Щавурду дирну, мушакъат хьуми хIисаввагу къабанну. ХIакьинусса кьинигу цайми-цайми паччахIлугъирттан кумагру буллайнна дур Аьрасатнал хIукумат. Гьай-гьай, ва хъанай дур хIукуматрал нани дур­сса политика. Жунма вания зараллив, хайрдив биллалисса чIявумур чIумал къабувчIунма личIай. Амма укунсса дяъвирдаву жанну харж дурсса жула арсру хъамабитан къашайссар, битангу къабучIиссар.

Райондалул библиотекалий

Февраль зурул 12-нний Ккуллал райондалул биб­лиотекалий хьунни Авгъаннал дяъвилува жула саллатI бувккун 30 шин бартлагаврин хас бувсса мажлис. БавтIминнащал хьунабакьин бувкIун бия Авгъаннал дяъвилул гьурттучитал: Къяннал шяравасса МахIаммадов Исакь, Ккуллал шяравасса Магь­диев Аьликьади, Хъусращиял шяравасса Закарияев МахIаммадхIажи. Шикку мукунма гьуртту хъанай бия райондалул Ветерантурал советрал председатель Загьидиев Аьбдул ва Ккуллал ва Лакрал районнал цачIусса военкоматрал вакил Юсупов Ажув.
Библиотекалул залдануву хIасул бувну бия Авгъан дяъвилун хас бувсса мурцIу ва чIирал кказит.
Махъру лавхъуна Ккуллал, Хъусращиял, Къяннал биб­лио­текарттал хъуниминнал – ХIажиева Аьйшал, ХIажиева Сабринал, Сяидова Аьйшал, цала-цала шяравасса гьурттучитуран дуллуна бахшишру. Гьай-гьай, ккаккан дурна культуралул программагу. Хьунабакьаврил ахирданий тIивтIуна ссупрагу.

Авгъан дяъвилул гьурттучитал

Хъусращиял школалий

Хъусращиял школалийгу хьунни мура кьинилун цIа кусса мажлис-батIаву. Мунил сиптачинугу хьунни Хъусращиял школалул учитель, Авгъан дяъвилул гьурттучи Закарияев МахIаммадхIажи. Ванал школалий хIасул дурну дия Хъусращиял шярава та дяъвилий гьур­тту хьусса жагьилтурал авур­сса витрина.
МахIаммадхIажинащал гъанну кIул хьуну ттул кIира-шанна шин хьунни. Укунсса инсан – учитель школалий ушаврилгу Хъусращиял школалул дурхху­ссар. Буккултращал кIибачIин ччай ура ванал цаятува бувс­мургу.

[pullquote]Жун багьлай бия, граждантал, аьралий кьай-кьуй ххила­ххисса машинартту ябуллай, гайннул хьхьичI-махъ бачин. Мукунма жуйн тапшур бувну бикIайва тоннельданучIан нанисса ххуллу ябуллангу. Ца чIумал тIайланна ттул ненттабакIравун щуну дия ккуллалул цIалцIи. Га яла госпитальданий дурккуна.[/pullquote]

— На увссара 1965-ку шинал Хъусращиял шяраву. Бу­ттайн Сяид, ниттийн Шагьбаният учайссар. Школа къуртал бувсса шинал, ссуттихунай, на увцунав армиялийн.ТIайла увккунав Туркисттаннал аьраяллил округрайн. Жул часть дия Теджен тIисса шагьрулий. Ти­ккун Ккуллал райондалия жу 33 жагьил увцунав. Тикку був­ссия ххюва барз. Жу яла Ашхабадрая самолетрай Кабуллайн бивчунав. Тания махъ на агьунав Баграм тIисса шагьрулийн.Тиккун ивсса чIумал, жу, лак­рал жагьилтал, личIи бувну, на навалу ливчIунав. Тиччагу цаппара хIаллавату Черекар тIисса райондалул центрданийн гьан увнав. Та дия Саланг тIисса хъинну лахъсса зунттул лув­сса шяравалу. Тиккугу хьуна 15 гьантта. Ганиннин учебкалий на хьуссияв Т-62 танкрал механик-водитель.Тана та зунттул вивх дия ччянира дурксса мукьра киилометралул лахъишиврийсса сива (тоннель). Тивухва най бия соляркалул ва навтлил 100 мм. дусса бургъурдугу. Зунттул тамур чулийсса кIанттун «Хинжан провинция» тIисса цIа дия. На тана та Хинжан тIисса кIанттайн тIайла увккунав ттула танкращал. Жун багьлай бия, граждантал, аьралий кьай-кьуй ххила­ххисса машинартту ябуллай, гайннул хьхьичI-махъ бачин. Мукунма жуйн тапшур бувну бикIайва та тоннельданучIан нанисса ххуллу ябуллангу. Ца чIумал тIайланна ттул ненттабакIравун щуну дия ккуллалул цIалцIи. Га яла госпитальданий дурккуна.

Яларив, цамур хатIа къавхьуну, ххассал хьуссара на та дяъвилуща. 1985-ку шинал увкIссара ма­хъунай сагъну, Заннал урувччухьун­ссияв.
Тиха учIайхту лавгссара Украиннал Ивано-Франковск тIисса шагьрулийн. Тикку яхъа­най, зий уссар ттул нитти­уссу Ютти. Та тиккусса локомотивр­ттал цехрал хъунаману зий ­уссар. На тиккува къуртал був­ссия дянивсса милицанал школагу. Зий уссияв милицану, ххюра шин дурссар на тих. Ттун дуллуна лейтенантнал чингу. Танияр махъ зий ивкIссара Хъусращиял шяраву личIи-личIисса давурттай. ЦIана, махъсса 8-9 шинай, зий ура школалий, ОБЖ-лул ва технологиялул дарсру дихьлай. Нава школалул оьрчIащал зий ухьувкун, дуклан увхра Да­гъусттаннал педуниверситетравунгу. ЦIана дуклай ура 4-мур курсирай…

Хъусращиял школалул дук­лаки оьрчIащал ва учительтуращал хьунаакьин увкIун ия мукуна Авгъаннал дяъвилул гьур­ттучи, Ккуллал шяравасса Магьдиев Аьликьадигу.
Хьунабакьаврий гьуртту хъанай бия 8-9-ми классирттал дуклаки оьрчIру ва вайннал учитель Рамазанова Имара, школалул директор АхIмадов ЩайхахIмад, ванал хъиривма Гъазибуттаев Макьсуд ва цаймигу учительтал.
ОьрчIал щаллу бувна дяъвилун хас бувсса шеърирду, дурккуна дикломацияртту. Махъру лавхъуна Закарияев МахIаммадхIажинал, Магьдиев Аьликьадинал ва цаппара учительтурал.
Цинявнналвагу кIицI бувна, Авгъанналсса бакъагу, чувчIаввагу дяъвилул чIу къабаяннав куну.

Маданиятрал къатраву

Февраль зурул 15-нний Кку­ллал райондалул маданиятрал къатравугу хьунни Авгъаннава жула саллатI зана хьу­сса кьинилун хас бувсса мажлис. Шикку гьуртту хъанай бия шагьрурдай яхъанахъисса Ккуллал райондалул шяраваллавасса та дяъвилул гьурттучиталгу. КIицI дуванну миннал цIарду: Магьдиев ЖахIпар, МахIаммадов Закир, ХIусайнов Камил, ХIажиев Закария, Абакаров Рамазан, Загьидинов МахIаммад, ХIамзаев А., ХIасанхIусайнов Расул, Жамалов Кьурбан.
Мажлис нани бувну ия Ккуллал райондалул администрациялул вивсса политикалул отделданул каялувчи Шамххала Хизриев. Ванал бувсуна Ккуллал райондалия та дяъвилий гьуртту хьушиву мяйцIалуннийн бивсса жагьилтал.
Авгъан дяъвилул гьурттучитурал цIания махъ лавхъуна Хъусращиял школалул учитель ва дяъвилул гьурттучи Закарияев МахIаммадхIажинал. Ванал мукунма барчаллагь куна райондалул бакIчитурахь, цивппа укун бавтIун, барча баврихлу. Махъру лавхъуна цаппара цайми дяъвилул гьурттучитуралгу.
Гания гихуннай, вай барча буллай, ккаккан дуруна Ккуллал райондалул маданиятрал зузалт­рал концерт.