[dropcap]М[/dropcap]оскавлив, Аьрасатнал ПрезидентначIасса Дагъусттаннал вакилханалий зузисса лакку душ, ихтиярду дуруччу, журналист Разита Мушидовал цIа чIявуссаннанкIулссар.
АцIнияхъайсса шиннардий Москавлив ялапар хъанай, Разиталкумагру бувссар чIявусса лакран, дагъусттанлувтуран. ЧIивисса оьрмулуву вачIявуссаннан бусрав хьунни. Уттигъанну Разитакьамул бунни «Евразиянал халкьуннал ассамблея» тIисса дунияллул халкьуннал дянивсса организациярдал союзравун.
Андриана Аьбдуллаева
ЦIунилва-цIунил мукIру хъанай бура хияллу чаннасса, дакI чумартсса инсаннахун хъиншивуртту, ххуйшивуртту дан цичIар къадахчайшиврийн. Ца ххаллилсса даву уттигу дунни Разитал.
Лак цачIун баву, цаннащал ца лакку мазрай гъалгъа тIутIаву мурадрай социал сетьрай тIивтIунни «Лакия» тIисса лакку группа.Группалуву буссар личIи-личIисса шяраваллавасса, шагьрурдаясса, дазул кьатIувссагума, лак, личIи-личIисса оьрмулул, пиша-сянатрал инсантал. Буссар, дуссухалу бувсса кунма, кувннащал кув жапрай, дакIниймур кIибачIлай, маслихIат ккаклай, хIатта ташурду бангума кьаст лахIлай. Дакъассар жул группалуву рихшантру, ссугру, байбизавуртту. Администратортурал баян бувссар мукунсса инсан га цIана группалува уккан антIишиву. Разитал дурсса хъиндайдихьулун жавабран ххаллилсса даву дунни Москавлив ялапар хъанахъисса Аьйшатлулгу. Группа тIивтIусса гьантрайва ванил оьвкунни му шюшин цинявннайн хъамалу. Москавливминнава гьан хьума лавгун, ххуйсса лакку ссупралух хъамалу хьунни.
[dropcap]В[/dropcap]анияр махъун багьан къабикIан, хъиривва цичIанма «Балхар» кафелувун оьвкуну, буллугъсса ссупра тIивтIунни Карашрал шяраватусса Банавшалгу. Группалувусса чIявуми кувннан кув кIулсса бакъанугу,нукIува кIулну бивкIсса куннасса дусшиву дайдирхьунни. Ихтилатру бур аьчухсса, хъярч-махсарттайсса ва хъунмурчIин тIааьнсса лакку мазрайсса. Маз ххуйну къакIулмагу ниттил мазрай ихтилат бан хIарачатрай ур. Маз ишлану къакIулли тIутIиманахьгу «Илчи» кказит чича, ккалаккира тIий бур!..
— Бивзрув, бурув. Барачатсса, даркьусса кьини хьуннав.
— Ссалам аьлайкум, лакрал жямат! Цукун буру? Зун хавар ххуйсса баяннав, кьатIув бувкми Аллагьнайн аманат хьуннав.
— Бивзрув, бурув, ххира лак. Дуниял тIитIивухъул, дуллалимуницIун Аллагьнал кабакьивухъул. Зуй барачат бишиннав, дакIниймур бартлаганнав, цIуллушиву дулуннав.
Укунсса бур группалувусса жап. Ххуйрихха.
ПатIималлив кIюрххил анавархъиндарай цила чивчусса назмулийну буллунни группалухьхьун ссалам:
Цукунсса хьхьу рутав,
лажинни буси,
Гьаба цIуртти бияв
чаннасса ссавний?
МакIра цимил увкра
аьламрал лагма
Ца макI къуртал хьуннин
цими щугълу бав?
Жунгу пикри хьунни «Лакия» группалувусса ххаллилсса лакку оьрчIая ва душварая жула буккултрахьгу бусан. Редакциялийн хъамалу бучIан вайгу рязи хъанай бур. ЦIакь дулланну лакрал дянивсса дусшиву.
