Республикалул Россельхознадзорданул сипталийн бувну, февраль зурул 3-нний ГИБДД-лул зузалтрал, Сулакьрайсса пострай рейдру дурну, аьлтту бунни къадагъа дирхьусса ва цаймигу тIалавшиннарду щаллу къадурну, хъус ххилаххисса машинартту.
Имара Саидова
Ва кьини ГИБДД-лул зузалтрал ххал бивгьунни шяраваллил хозяйствалул сурсат (ризкьи, дикI, нагь, нис, накI ва цаймигу кьай-кьуй) ххилаххисса ттуршвахъул машинартту. ХъунмурчIин бия ца региондалия цамунийн ххилаххисса машинартту. Му бакъассагу, ххал бивгьунни Къабардин-Балкьарнал республикалия, Ростоврал ва Аьшттарханнал областирдая дукия ххилаххисса фурарду.
Россельхознадзорданул госинспекциялул зузалтрал дурсса ххал бигьавурттай аьлтту хьунни ветеринар ва фитосанитариялул чулухасса тIалавшиннарду щаллуну биттур дуллай бакъашиву. Ризкьи ва ххяххиялул сурсат ххилаххиминначIа аьркинсса документру бакъашиву. Низам къадурурччуну зузими кIункIу бунни КоАП АьФ-лул 10.2, 10.3, 10.8 ва 14.43 административ статьярдал танмихIрайн.
КIицI лаганну, Россельхознадзорданул сипталийн бувну, гьарца зуруй Республикалул федерал ххуллурдай дайшиву къадагъа дирхьусса сурсат ххилаххими аьлтту буллалисса рейдру.
