[dropcap]Ф[/dropcap]евральданул 21-нний ДР-лул БакIчи Владимир Васильев хьунаавкьунни журналистътуращал. Мунин савав хьунни АьФ-лул Президент Владимир Путиннул Федерал Мажлисрансса Рисала.
Мунил хIакъиравусса цалвами пикрирду буслай, Республикалул каялувчинал кIицI бунни цинияргу хьхьичIунну дикIан аьркиншиву инсаннал капитал. Инсаннал капитал лядуккан дуван къашайссар, ххуй-хъинсса дуккаву, кIулшиву дакъахьурча кунни ванал. Владимир Васильевлул бувсунни республикалул школарттан аьркинссаксса луттирду лавсун бушиву ва ми ябан аьркиншиву, ттизаманнул технологияртту ишла дуллансса жагьилсса пишакартал хIадур буллан аьркиншиву.
Дагъусттаннал БакIчинал тIимунийну, цIанасса ппурттуву республикалий чаннайн дуккан дуллай бур ххютулусса экономика, муницIунна гьарза дуллай бур бюджетравунсса налогру дучIан даву ва чан личIан буллай бур республикалул буржру.
Владимир Васильевлул бувчIин бунни Аьрасатнал лагрулий демографиялул тагьар даххана хьуну душиву, оьрчIру буллалаву цахъи чан хъанай душиву. МуницIун бавхIуну, 1-мур ва 2-мур оьрчI баврихун булайсса напакьартту ххи буллан най бур 2020 шинал. Гьашину июльданул 1-нния махъ сайки кIийлва ххи бан най бур инвалидсса оьрчIах буруглагиминнансса напакьа, дантIий бур хIаллихшинну чIявусса оьрчI-бакI бусса кулпатирттангу.
Республикалул каялувчинал бувсунни мукунма ихтиярданул документру бакъа дурсса чIярусса хъуни къатри судрал хIукмулийну къатрал заллухъруннацIун цIакь дурну душиву. Утти квартирарттаву ялапар хъанахъисса кулпатругу ххишала нигьа къабуслантIиссар буккан баврия. Владимир Васильевлул пикрилий, му тIайласса хIукмур, мукуннасса ара дикIан аьркинни бизнесращалгу.
ДР-лул БакIчинал бувсунни «Земский учитель» тIисса дуккаврил программа щурущи дуллалишиву 2020 шиная тиннай. Программа зий дайдирхьувкун, шяраваллавун зун гьан рязи хьусса учительтуран булунтIиссар 1 млн. къурушрал.
Муния махъ Владимир Васильевлул жавабру дуллунни журналистътурал суаллахьхьун.
