«Свиной грипп (H1N1)» ва  вирусрал ляличIисса жура дур. Ва цIуцIаврил щалла дунияллий къачансса инсантал оьрмурдацIагума бувну бур. Цанчирча ттинин ва цIуцIаврил хъирив ххуйну лавну, мяълум бувмур къабивкIун тIий.

Цалчин Мексиканаву инсан ивчIаннин свиной грипп инсаннал оьрмулун нигьачIисса душиврун ккалли къадайссия.

Свиной гриппрал вирус муданма баххана хъанахъаврийн бувну (мутация), аьлимтураща кIул бан хъанай бакъар тIар, му та сукку хьунтIиссарив, чув дайдишинтIиссарив. Ванил  циллагу  гриппрал вайми журардаяр (жунна кIулсса, жува вардиш­сса) цукунчIавсса личIишиву дакъар. Амма  дакIний битияра  оьрмулун ва нигьачIисса душиву. Гриппрая зува бюхъайссаксса бурувччуну бикIаншиврул халкьуннал дарурттащал архIал ишла буллалияра хIакиннал дарурттугу.

Свиной гриппгу лахъан аьркинссар уттуивхьуну, жунна вардишсса грипп лахъайсса кунна. Грипп бигьану, захIматну къадирсса цучIав  акъахьувкун, цукун хъин хьунтIиссаривгу цинявн­нан кIулли.

Грипп дирма  цанмалусса къатлуву уттуишин айссар, калихьугу, шану-кIаралугу, тIахIни-кIичIугу цанналусса личIи дурну. Чурххал кIиришиву лагь дан ишла байссар парацетамол хIаласса даруртту. Хъиннура кIиришиву лахъну духьурча, ххалаххи байссар аналгин-димедролданул (внутримышечно). Чара бакъа оьвчин аьркин­ссар хIакиннайнгу.

Вирус яла бас дайсса  дарурттан хIисав хъанай бур Тамифлю, Арбидол, Лаферобион, Лаферон. Агарда жулла региондалий Тамифлю бакъахьурча, бучIиссар ишла бан Занамивир (Реленза). ХIакьинусса кьининин вай препаратру бур яла ябацIанми,  свиной гриппраща уруччин.

* * *

Д

агъусттаннал ЦIуллу-сагъшиву дуруччаврил министерствалул хIасиллайн бувну, жулла республика эпидемиялул даражалий дакъасса дур.

Лабораториялий ххал увну тасттикь хьусса 33-ннава 4 ур свиной гриппрал къашавайсса. Гриппрал ва бявкъу-гъили хьуну къашавай хьуми чIявуми оьр­мулул бугьарасса бур, цивппагу МахIачкъалалив, Каспийскалий, Буйнакскалий, Хасавюртлив яхъанахъисса.

ХIакинтал хIадурссар къашайшалт кьамул бан, аьркин­сса дарурттал луртанну жучIара дуссар, дезинфекция дансса зат­ругу дуссар. Так дакIний битияра: чIяву инсантал батIайсса кIанттурдайн мазанарду, маскарду лахлахияра, ччя-ччяни шюшлашияра кару, ссахIвангу був­ккун. Зуйнна грипп диллали­сса кIул шайхтува, хIакинначIан насияра.

ЦIуллуну  битаннав.

ХIадур бувссар
Т. ХIажиевал