Жижара

Сулайманнул арс Кьасимов МахIач

Январь зурул 12-нний  дунияллия лавгунни 1-мур ЦIувкIратусса захIматрал ветеран, Сулайманнул арс Кьасимов МахIач. Ванал ппу дяъвилия зана къавхьуну ур, нину Аьйшатгу ччяни дунияллия лавгун бур.

ЦIувкIрав 7 класс, ЧIяв 10 классгу къуртал бувну, дуклан увххун ур Буйнакскаллал финансирттал техникумравун. Му къуртал баврийгу гьашиву къадурну, ларайсса кIулшиву ласун увххун ур Ухссавнил АьсатIиннал паччахIлугърал университетравун, шанна шинава му вузрава Чачан-Ингушнал паччахIлугърал пединститутравун перевод ларсун дур. Зий ивкIун ур Крайновскалийсса райфинотделданул хъунама экономистну. 1963 шинал ва ивтун ур Къизлардал райондалул хъунама инспекторнал къуллугърай.

Муния махъ зий ивкIссар Кочубейливсса базалий складрал хъунаманугу. 1965 шиная тинай зий  уссия Къазахъисттаннай, Шевченко (уттисса Актау) шагьрулий ссяткартурал бригадалул хъунаману, зий ивкIссар Гурьеврайсса шагьрулул комбинатрайгу, цайми шагьрурдай жаваблув­сса давурттайгу.

ЧIярусса шиннардий дакI­нийхтуну бувсса захIматрахлу МахIач лайкь хьуну ур хIурматрал грамотарттан, бахшиширттан. МахIач ия цалла даву ххуйну кIул­сса, хIурматрайсса пишакар.

Ва дунияллия лагаврил кьур­чIишиву кIидачIлай буру кулпат ПатIиматлухь, арснахь, душнихь, ссурваврахь, куявтурахь, ссурахъаврахь, гъан-маччанахь. Имандалий лавгун лякъиннав, бунагьирттал аьпа баннав, рухI бигьаний дишиннав.

1-мур ЦIувкIуллал жямат



ХIасаннул арс Ибрагьимов МахIаммад-Расул

Оьрмулул 85 шинаву жуятува батIул хьунни ххаллилсса инсан, Совет Аьралуннал аьрали гужирдал полковник, ХIасаннул арс Ибрагьимов МахIаммад-Расул.

МахIаммад-Расул увссар 1934 шинал Щардал шяраву. Гъумучиял школагу хьхьичIунну къуртал бувну, дуклан увхссар М. В. Фрунзел цIанийсса Одессаллал аьрали артиллериялул училищалийн. Мугу къуртал бувссар хIаписарнал чиндалуву. СССР-данул Аьрали гужирдал каялувшиндарал хIукмулийн бувну, тIайла увкссар къуллугъ буллан Германнавун (ГДР). Цаппара шиннардива тIайла увкссар Буйнакскалийн. Аьрали гужирдаву къуллугъ буллалисса чIумул му­тталий МахIаммад-Расул лайкь хьуну ур ЯтIул ЦIукул ордендалун, цаймигу орденнан ва медаллан, хIурматрал грамотарттан.

Тамансса шиннардий зий ивкIссар МахIачкъалалив Республикалул Аьрали комиссариатрал кIилчинмур отделданул каялувчину.

Аьрали къуллугърая лавгун махъ зий ивкIссар «Каякент» санаторийлул хъунама хIакиннал хъиривчуну, «Патриот» гостиницалул директорну.

МахIаммад-Расуллул щала оьрму лавгунни Ватандалул цIаний къуллугърай, цайминнангу эбратну. Бюхъу бусса каялувчи, лавайсса даражалул пишакар, инсаншиврул бутIа гьарза-гьартасса, чил буруккин­ттах баччибакъулшиву къадай­сса, инсаннал чIарав ацIан анаварсса ушиврийну бусравну ия ватанлувтурал дянив.

Хъуннасса кьурчIишивугу кIидачIлай, жижара буллай бу­ру ванал арсурваврахь, уссур-ссуннахь, гъан-маччаминнахь. МахIаммад-Расуллул рухI хъинний дишиннав. Алжан нясивну лякъиннав!

Щардал жямат


Исмяиллул арс  Илдаров Аьвдулгъапур

Хар-хавар бакъа оьрмулул 73 шинаву ахиратравун лавгунни уздансса зунттал чув, гьарта­сса дакIнил заллу, Хъуннащиял шяраватусса Илдаров Аьвдулгъапур.

Аьвдулгъапур увну ур 1945-кусса шинал Хъуннащиял шяраву Исмяиллул ва Муъминатлул кулпатраву. Хъурхърал школагу къуртал бувну, увххун ур Щурагьиял дахху-ласулул техникумравун. Мугу ххуйну бувккуну, ув­ххун ур МахIачкъалалив Машлул институтравун. Дуккаву къуртал дурну махъ зун ивкIун ур Машлул министерствалий. Микку Аьвдулгъапурдул ккаккан бувну бур цува итххявхсса, хъинну за кIулсса зузала ушиву. ХьхьичIунайсса зузала уну тIий, му ивтун ур Дагъус­ттан Республикалул хъунаманал хъиривчуну (машлул). Лайкь хьуну ивкIссар чIярусса хIурматрал грамотарттан ва наградарттан. Ванал кулпат Соня жагьилсса оьр­мулий хар-хавар бакъа яла лавгссар. Аьвдулгъапурдул ххишала бакъа хъунмасса захIмат бивхьуссар оьрчIру дуккин буван, тIайласса тарбиялул ххуллийх буцин, цала-цала къатрай битан, гайннан нину дакъашиву кIул хьун къабитан. 

Аьвдулгъапур ахиратрал шаврил хъуннасса кьурчIишивугу кIидачIлай, жижара буллай буру ванал душнихь Рукьижатлухь, арсваврахь Исмяиллухь, ХIажинахь, ХIамзатлухь, уссурваврахь Гъазинахь, Багьауттиннухь, Зубайрдухь, махъсса уссурссуннахь ва цинявппагу гъан-маччанахь. Цал бунагьирттал аьпа баннав, алжаннул ххари аннав, гьав нурданул дуцIиннав, рухI алжаннаву дишиннав! Амин!

Хъуннащиял жямат


Аьрали гужирдал полковник

Ибрагьимов МахIаммад-Расул ХIасаннул арс

ахиратрал шаврил жижара буллай, хъуннасса кьурчIишиву кIидачIлай буру ванал оьрчIахь, уссурссуннахь, гъанцириннахь. Махъминнал оьрмурду лахъи баннав!

ДР-лул Аьрали комиссариатрал зузалт


Жула ххаллилсса дус-ихтивар, чумартсса дакIнил заллу

Ибрагьимов МахIаммад-Расул ХIасаннул арс

дунияллия лагаврил кьурчIишиву кIидачIлай, дакIнийхтунусса жижара буллай буру ванал арсурваврахь, щалагу агьлу-авладрахь. Махъминнал оьрмурдай барачат бишиннав!

АрхIал дуклай бивкIми


ХIасанбасрил арс Ханов

Шарапуттин

Нязаннивсса оьрмулий вай гьантрай дунияллия лавгунни  Лакрал райондалул ДЮСШ-рал директор Ханов Шарапуттин ХIасанбасрил арс.

Шарапуттин увну ур 1972 шинал ЧIурттащиял шяраву. Гъумучиял школагу къуртал бувну, дуклан увххун ур  Дагъусттаннал шяраваллил хозяйствалул институтрал ризкьилул хIакин шай­сса факультетрайн.  Му къуртал бувну махъ уссия Тверь шагьрулий ишбажаранчишиврий зий. 2003 шинал буттал ватандалийнай зана хьуну, хIакьинусса кьининин зий уссия райондалул ОьрчIал ва чIаважагьилтурал спортшколалул директорну.

Ва чIумул манзилданий Шарапуттин ия цала дакIнин лавсъсса къуллугъ хьхьичIунну бартбигьлай. Ванал хIарачатрайну райондалий  спортрал даву диялну ларай хьуссия. Ва школалийсса оьрчIал районнал, республикалул ва щала Аьрасатнал даражалийсса бяст-ччаллай хьхьичIунсса кIанттурду бугьай­ссия.

Шарапуттин бусравну ия цува каялувшиву дуллалисса коллективрал, райондалул жагьилтурал ва спортсментурал дянив.

Хъуннасса кьурчIишивугу кIидачIлай, жижара буллай буру уссурваврахь, кулпатрахь, гъан-маччаминнахь.

Шарапуттиннул гьав нурданул дуцIиннав! Алжаннул ххари аннав!

Даврил уртакьтал,
гьалмахтал, райондалул жагьилтал