[dropcap]Ф[/dropcap]евральданул 8-нний вай гьантрай Дагъусттаннайн увкIсса АьФ-лул экономикалул министр МаксимОрешкиннул, Азирбижаннал экономикалул министр Шахин Мусттапаевлул ва ДР-лул БакIчи Владимир Васильевлул цачIу ххал бивгьунни Ярагъ–Казмалярдайсса дазуй машинартту итабакьайсса кIанттурду ва кIул хьунни мунил давурттащал.
Упродор «Каспий» тIисса федерал сакиншиндарал хъунаманал хъиривчу Сергей Улеевлул хъамаллурахь бувсунни Аьрасатнал ва Азирбижаннал дазуй машинарттал ламу баврил давурттал хIакъираву. Ламу буллай бур Самур неххайх машинартту занан бигьа баву мурадрай, бувну къуртал бантIий бур гьашину ноябрь зуруй. ЦIанасса ппурттуву ламу баврил сайки 59% давурттал дузрайн дурккун дур.
«Каспий» Упродор ФКУ-рал хъунаманал бусаврийну, му ламуйх машинартту занантIиссар 2 ххуллийх, аьркин хьурча, 3-мур ххуллугу (реверсив ххуллу) тIитIинтIиссар, агарда машинартту чIяву хьуну, заназаву хIурхIа лаглагисса ишру хьурча. Ламул лахъишиву дур 325,3 метра, утташиву – 17,5 метра.
АьФ-лул Минэкономразвитиялул каялувчинал тIимунийну, му объектрал дикIантIиссар стратегиялул агьамшиврул мяъна, Азирбижанная ва Иранная Аьрасатнавун нанисса хъус хIисавравун ларсун.
Бусравсса хъамаллуращал архIал бия ДР-лул ХIукуматрал Председатель Артем Здунов, Азирбижаннал Республикалийсса Аьрасатнал Федерациялул Вакил Михаил Бочарников, Аьрасатнал Федерациялийсса Азирбижан Республикалул Вакил Полад Бюльбюль- оглы, АьФ-лул Ухссавнил Ккавкказуллал иширттал министрнал хъиривчу Ольга Рухулаева ва цаймигу.
