Аслийсса сянатру яхьуншиврул

Уттигъанну МахIачкъала шагьрулул 4-мур школа-интернатрай хьунни буттахъая жуйнна дирсса касму-ся­натирттал мастер-классру: бартбисуртту щащаврил ва бархъаллал тIахIунттал. Ми сакин бувну бия Республикалул Халкьуннал творчествалул къатлул.

Бадрижамал Аьлиева

ОьрчIахь вай пишардая буслай, ранг-рангсса барбисуртту цукун щащайссарив ва синааьрщарая личIи-личIисса аьла­матсса затру цукун дайссарив ва кьини ккаккан дуллай бия Рес­публикалул Халкьуннал творчествалул къатлул пишакартал Изаят Мажидова ва Земфира Мусаева. ОьрчIал личIлулну вичIи дирхьунни вай сянатру ляхъаврил тарихрах, гьарцагу касмулул хасшиннардах. Ва кьини оьрчIан кIул хьунни бартбисуртту яттил ппалуя байшиву, ппалул ххаллу ранг дувайшиву зунттаву дартIсса уртту-щинал. ЛухIисса ранг, масалдаран, дувайшиву кьюкьумарттул тIутIая. КIул хьунни бартбисулийсса гьарцагу накьичрал цилла мяъна душиву, лархьхьунни цаппарасса накьичру дувангу.

Земфира Мусаевал бувсунни синааьрщарая дурсса тIахIни-кIичIу экологиялул чулуха яла марцIмур, яла хъинмур душиву, мивасса хIачIия ва дукрагу оьнура нахIусса дикIайшиву.

ОьрчIру хъунмасса гъирарай хIарачат буллай бия цалла каруннах тIахIунттив дуван.

Ва кьини оьрчIан цIу-цIусса чIявусса затру кIул хьунни.

* * * 

К

улпатран ва оьрчIан социал кумаг баврил Республикалул центрданийгу Республикалул Халкьуннал творчествалул къатлул сакиншиндарайну хьунни синааьрщарая ссихьри даврилмур мастер-класс. Му бунни Республикалул Халкьуннал творчествалул къатлул пишакар Зугьра Гьаруновал.

ОьрчIру шавкьирай дуллай бия ссихьри, цанма къа­бувчIлачIимургу цIухлай, сянаткаргу гъирарай жавабру дуллай бия оьрчIал суаллахьхьун.