Къаччуччиншиврул зула талихI

Ккуллал райондалул цIу-лещанлув

[dropcap]И[/dropcap]нсан оьрмулуву циксса бала-апатIрая уручлай ухьурчагу, апатIрахьхьун иривсса чIунну чан хъанан къадикIай. Мунияту хIукуматрал сакин бувну бур личIи-личIисса апатIирттаяту инсантал буручлансса ва ми хьуну махъ кумаг буллансса идарар­тту. Ккуллал райондалийгу бур, 32-мур номерданийсса, цIу лещан дувултрал идара. Цала даврил хьхьичIунми мурадирттая буслай ур идаралул хъунама Къудуев Зайнуллагь.


— ЦIу дагьаву хъанай дур хъинну чIявусса бала-апатIру шайсса ишну. КьюлтIсса зат бакъар, чIяруми цIу дагьавур­тту хъанан дикIай ссуттил ва кIинттул, инсантал къатри гъили буллан бивкIния махъ. Ва чIумал, кугьнасса чаннал ххаллу багьана хьуну, ттукIрай зузисса пачру ургала акъа кьабитаврийну хъанай дур цIу дагьаву. Жу, Ваччавсса цIу лещан даврил зузалт, вай иширттал ялув бавцIуну буссару. Хьунабакьару идарарттал зузалтращал, укунмасса инсантуращал, дуклаки оьрчIащал. Жу лахьхьин бувару, нажагь цIу дагьарча, цалчин, ганил лама лахъа-хъун хьуннин, цукун лещан бан аьркинссарив бусласисса ишру. Циняв идарарттай цалчин ишла дуван аьркинсса затну хъанахъиссар огнетушитель.

Жу жула давриву агьамсса иширан ккалли бувару шяраваллаву щин ласун бюхъайсса бярду бикIаву. Вай бярду буван буржлувссар шяраваллал бакIчитал. Мукун бунува, чIявуми шяраваллал бакIчитал ва иширах ялттувану буруглагисса кIанттурду хъанай бур. Кув щархъаву, цуппа бяр бухьурчагу, щин ласун машина бацIансса кIантту хIасул бувну бакъар. Райондалул дяних нанисса нехгу кIинттул микI лачIай. Мунияту жун архну гьан багьлан бикIай щинал хъирив. Гай ларсун бучIаннингу цIарал, жух къаялугьлай, гьарца зат ланцI дурну ляхълай дур. Мунияту жул хъунмасса тавакъюри шяраваллал бакIчитурахь: машиналул щин ласун бюхъайсса кIантту чара бакъа щаллу бувну битияра. Вайннал ва иширал ялув тIутIимургу бикIай арцу дакъар тIисса.

Ялагу жунма кIулли шяраваллавусса жула къатри чIяруми кувнницIун кув ларчIсса душиву, царай къатрайн цIу дагьарча, гай чIаххуврал къатрайнгу ххяххайшиву. ХIазран бакъар­хха: «ЦIу дагьаву къахьун дитан бигьассар га лещан даннияр», — учайсса.

ЦIу лещан дувултрал зузалт тавакъю буллай бур Ккуллал райондалул жяматрахь: му­гъаятну бикIияра цIу къадагьан, ттукIрай зузисса пачру ургала акъа макьабитару, оьрчIру учайсса затирттаха, пиротехникалуха баччи бакъа тIуркIу тIий мабитару. Буруччара зувагу, зула оьрчIругу оьсса балаллуща.