Духмур шин тIайла дуклакисса, цIусса шин хьунадакьлакьисса байран хьунни декабрь зурул 28-нний Ваччав, шяраваллил майданнив. Ганиннин даруну диркIсса дуниялгу, гай кьинирдай, кIи дуркIшиву буслай, бувна марххала.
ХIажимурад ХIусайнов
Ахттая махъ ссят ца хьусса чIумал Дякъил Ттаттагу, ссайгъатирттал дарвагращал ва Марххала-Душнищал, культуралул зузалтгу бувкIуна майданнив. Шикку сахIналул хьхьичI бацIан бувну бия исвагьий елка. «Ча дуркра, цIусса шин?» тIий, балай-гьалайрдайну тяхъашиву дуруна.
Дякъил Ттаттал ва Марххала-Душнил сахIналия барча бувна райондалул жямат цIусса шинащал, барчаллагь куна жуяра лаглагимур шинахь. Райондалул жямат, тяхъашиврийн бавтIми барча бувна райондалул бакIчи Рамазанов Шамиллул ва ванал хъиривчу Давдиев Анатолийл.
Дякъил Ттаттал бавчIуна ссайгъатру оьрчIайх. Райондалул культуралул зузалтрал ккаккан дурна хъинну ххуйсса концерт. Тяхъашиву лахъи ларгуна ахттакьуннин.
Укуннасса тяхъашивуртту хьунни райондалул 14-рагу шяраву.
