Фаик Закуев: «ТIабиаьтрал сурат къаххуйсса къадикIайссар»

Фаик Закуев

[dropcap]В[/dropcap]ай гьантрай Дагъусттаннайн Бакуйннал шагьрулия бавунни Курди Закуевлул арс Фаик Закуев оьрмулул 86 шинаву дунияллия лавгсса кьурчIисса хавар.

ПатIимат Рамазанова
[dropcap]Ф[/dropcap]аик Закуев Азирбижаннал лайкь хьусса журналистри. Ванияр цимирагу шинал хьхьичI Фаиклуясса чагъар «Илчилийн» бувкIсса чIумал, вих хьунгума захIматну бия «Хъявринсса ччаврил» авторнал, Курди Закуевлул, арснал чагъар кIунттихь бушиврий. Фаикгу цIубутIуй ттун ия так хъунасса чичул ва аьлимчунал арс. Танал чичрурду ккалан бикIайхтурив, гассят бувчIуна Фаиклулмур цIагу, литературалул дунияллий дикIу, публицистикалул, журналистикалул дунияллий дикIу, цIакьну дарцIусса душиву.На та чIумал гъирарай таржума дурссия ла­кку мазрайн Фаиклул чичрурду – «Жул буттал къатта», Гъумуксса буттал къатлуцIун бавхIуну, яргсса асарду дакIурдиву гьузиххин бувсса. Жу ми чичрурду «Илчилийгу», «ЦIубарз» журналданийгу рирщуссия.

Нитти-буттащал

Фаик Закуев цувагу чIал къавхьуну увкIссия МахIачкъалалив, жущал хьунаакьин. Буван­сса ихтилатрал репетициягума дуллай, хIадур хъанай буссияв нава. Фаик Закуевлул тIурча, ца кIукIлуну ттул кагу дургьуну: «Фатима-ханум, ттул душ, вин барчаллагь, буттал аьпалул хIурмат бушиврухлу ва ттул, ла­ккучунал, чичрурду лакку мазрайн таржума дуллай бушиврухлу», — куна. Амма « ттул, лаккучунал, чичрурду лакку мазрайн таржума дуллай» тIисса калима танал мукун пашманну ва артистичнайну зумух ларсунахха, та лахIза хIакьинусса кьинигу хъамакъабитай.

1941 шинал 8 шинавусса Фаиклун «Лилипут» тIисса къааьламатсса фотоаппарат пишкаш бувну бивкIун бур.Тания мукьах ва сурат рищаврихун агьну ур. Гъинттул ниттищал Лаккуйн увкIсса ппурттуву, 1942 шинал ванаща бювхъуну бур Гъумучиял ссавруннал ялтту лехлахисса немецнал самолетрал сурат рищун. Таний агьали махIаттал хъанай бивкIун бур немецнал самолетрал сурат рищунсса духIин хьусса чIивисса оьрчIай. Яла буттал ванан пишкаш бувну бур цахъи ххуйсса фотоаппарат ФЭД. Фаик ур вяйлиллан ххирасса цува тIулуйн уциншиврул пишкаш бувна буттал фотоаппарат, ппу нукIузаманнул кIалазурдардийсса чичрурду лахьлан икIайва, ми чичрурдал суратру ришлаши увнав цува тIий. ЗахIматрал ххуллурив байбивхьуну бур «Азирбижаннал физкультурник» тIисса кказит­рай литсотрудникнал даврия. КутIасса чIумул мутталий ванал цIа машгьур хьуну дур буккулт­раву ва архIал зузиминнаву.

Ванайн пейзажирттал ус­ттар учай­сса бивкIун бур архIал зузиминнал. «ТIабиаьтрал къаххуйсса сурат (фотокадр) къадикIайссар» тIисса ванал калима жагьил­сса журналистураву хIакьинусса кьинигу машгьурнура дусса дур. Азирбижаннал лайкь хьу­сса журналист акъагу, ва ур А. Аьлиевлул ва Г. Зардабил цIанийсса «Мусил перо» премиярттал лауреат. Ва ур Азирбижаннал тIабиаьтрал галерея цалчин хIасул дурма.
Закухъал Курдил дакIнийн бичавурттал чичрурду къуртал дуллай ур Фаик Закуев укун­сса мукъурттийну: «ТIайламур бусан, ду-дакъацири щавурду ччаннай, чурххал базурдай дунугу, къашай ттуща хIакьинугу шава щяикIан. ДакI кIункIу тIийнна дур архсса хьхьирирдал тихсса шагьрурдайн иян, чаннану-някIсса Тебердалул ццунсса вацIравух уккан, фотокамералущал къаралданий ацIан Буршиял чIарав, зунттал аврдайн. КIункIу тIийнна дур дакI Гъумуксса Ччярав щаращул бирлиянтрал марцIшиврия нахIала бан, ттула ппу дакIнийсса кIа щаращуйн кьус икIан…».
Фаик Закуевлул бивкIулул хавар бавмигу личIанхьуви тIабиаьтрал суратру ласлан Фаик чун-унугу аьрххилий лавг­сса кунма…