Бахшишру

Москавлив ва Центральный федерал округрал шагьрурдай ЦIусса шинал цалчинсса гьантрай хьунни «Мастера искусств страны – детям России» тIисса ихIсандалул акция.

Шикку гьуртту хьунни музыкалул, театрдал, кинордал ва цаймигу творчествардал хьхьичIунсса интеллигенция. Ва акциялул сакиншинначиталну хьунни творчествардал союзру ва ихIсандалул фондру. Дагъусттаннал Республикалул чулуха шикку гьуртту хьунни пианист, Музыкантътурал союзрал правлениялул председатель Хан Баширов.


Имара Саидова
Акциялул программалул лагрулийсса хьунабакьавуртту хьунни Рязаннай, Ярославрай, Калугалий, Москавлив ва цаймигу Аьрасатнал шагьрурдай.
Творчествалул хьунабакьавурттай Хан Мирзахановичлул оьрчIахь бувсунни Дагъусттаннал билаятрая, щаллу бунни цала композицияртту, дуллунни суаллахьхьунсса балжисса жавабру. ОьрчIан бахшишран буллунни Дагъусттаннал композитортурал чирчусса нотардал сборникру, жула республикалул билаятрал аваданшиврия бусласисса дискру.

Хьунабакьавурттай гьуртту хьун бувкIминнал барча дунни машгьурсса музыкантнал оьрмулул 65 шинал юбилей. Музыкалул искусство хьхьичIуннай даврихлу Дунияллул халкьуннал музыкалул ишккаккултрал союзрал чулухасса арцул медаль ва диплом буллунни ванан союзрал президент Александр Соколовлул.