[dropcap]Я[/dropcap]нварь зурул 11-нний МахIачкъалалив «Аьрасат – ттул тарих» тIисса музейраву шадлугърал даражалий тIиртIунни художник Асият ХIажимирзаевал суратирттал выставка.

Имара Саидова
[dropcap]С[/dropcap]урат дишаврил гьунар чIивинияцIава бусса Асият ХIажимирзаевал пахру-ххара бакъашиврул уттинин цилалу­сса выставка дурну дакъар. Рес­публикалий дуллалисса выставкарттавух тIурча, ва цимилгу гьуртту хьуну бур. Выставкалийн бувкIцири, ца зумату кунма, буслай бия Керимов Жаруллагьхъал итххявхсса ва ххишала бакъа гьунар бусса кулпатрая. Мукьва класс къуртал бувсса Асият кьамул бувну бивкIун бур Москавуллал В. М. Суриковлул цIанийсса институтрачIасса художествалул школалийн. Тани Аьрасатнаву институтрачIасса художествалул школарду бувагу кIива бивкIссар, ца — Москавлив, ца -Санкт-Петербурглив.

1966 шинал му школагу хьхьичIунсса хIасиллай къуртал бувну, Асият бувххун бур Москавуллал В. И. Суриковлул цIанийсса Художествалул институтравун. Ххюя выпускник усса курсирай Асиятлул дипломрал даврин бивхьуну бур яла лаваймур кьимат, цуппагу тиккува бацIан буллай бивкIун бур. 1972 шиная шихунмай Асият зий бур ДГПУ-лул художествалул ва графикалул факультетрай, «композициялул» ва «живописьрал» дарсру дихьлай, дипломрал давурттал каялувшиву дуллай.
Асиятлул яруннан хIисав шай цайминнан къахIисав шаймургу. Натюрмортру, портретру дур ванил яла ххирами жанрарду. Выставкалий тамашалий дирхьуну дия 50-ннийн дирсса суратру.

[dropcap]В[/dropcap]ыставка тIитIлатIисса мажлисрай махъру лавхъуна: каялувчи Аьбдулзагьир Мусаевлул, ДР-лул Художниктурал союзрал председатель Кьурбан­аьли МахIаммадовлул, Аьрасатнал лайкь хьусса художник, искусствоведениялул кандидат художник Наталья Мусаевал, Аьрасатнал ва Дагъус­ттаннал Халкьуннал художник, скульптор Гайбат Гайбатовлул, Дагъусттаннал халкьуннал художник Хайруллагь Кьурбановлул, Художествалул графикалул факультетрал декан Оьмар ХIабибовлул.

Асиятлул выставка тIитIа­ву барча дан бувкIун бия Гьун­чIукьатIрал шяраваллил ккурандалул председатель ХIажибутта ХIусайнов, Гьун­чIукьатIрал шяраваллил хъунисриннал советрал хъунама Сиражуттин ХIажимирзаев, гъан-маччами, дустал ва архIал зузими.
БувкIцириннахь барчаллагь тIисса ихтилат бувна Асиятлул буттал Жаруллагь Керимовлул.
Цила чулуха Асиятлул барчаллагь увкуна выставка сакин дурсса «Аьрасат –ттул тарих» музейрал директор Азнаур Аджиевлухь, Аьбдулзагьир ва Наталья Мусаевхъахь.