ЦIусса шинал хьунийнсса ххуйсса бахшишну хьунни республикалул чIявусса школарттан, миннувух Бабаюртуллал райондалийсса КIамахъаллал, Карашрал ва Кьубиял школарттан мюрщи автобусру булаву.Вайннан бувкIунни ххуйва-ххуйсса, лахъи-кутIасса манзиллайн дуклаки оьрчIру ва вайннал учительтал рахIатну занансса цIусса автобусру.
З. АьбдурахIманова
«Жул школартту, аривсса цаймигу школартту кунма, багьайссар Къизилюртливсса территориал кIулшивуртту дулаврил управлениялийн. Мунияту жул дуклаки оьрчIру гьурттусса олимпиадартту, конкурсру ва цаймигу мероприятияртту шай Къизилюртлив, Хасаврай, Бабаюртлив ва цаймигу кIанттурдай. Сайки ца зуруй кIива-шанма аьрххи къавхьуну къаличIай, хаснува агьамсса байраннал хьунийн ва ЕГЭ-рдал, ОГЭ-рдал ппурттуву. Укунсса маршрутка жул школалун булавугу хIисав дуллай буру ца хъуннасса, ххаллилсса бахшишран. Утти жуща, жула оьрчIругу бувцуну, личIи-личIисса журалул аьрххирдайн буклан бюхъанссар», — тIий бур, ца зумату кунма, Карашрал школалул директор ТIагьир Айгунов ва Сангардал школалул директор Магинора АхIмадова.
[dropcap]Ш[/dropcap]анмагу школалул учительтал, дуклаки оьрчIру ва вайннал нину-ппу дакIнийхтуну барчаллагь тIий бур Республикалул БакIчи Владимир Васильевлухь, ДР-лул ХIукуматрал председатель Артем Здуновлухь ва ДР-лул кIулшивуртту дулаврил ва элмулул министр Уммупазил Оьмаровахь, хъинну аьркинсса ва бусравсса бахшиширттахлу.