Ххарил лехлай бия циняв

Ттун бахтти хьунни Вихьуллал шяраваллил оьрчIал багъраву ЦIусса 2019-ку шинан хас дурсса шадлугърах ябитан. Укун­сса шадлугъирттал оьрчIру ххарил лехлахи баврил бугьлагьиссар вайннал оьрмулуву,

тарбия бавриву агьамсса кIану. ОьрчIру бугьара хьуну махъ вайннал цалами оьрчIахьгу буслантIиссар цIусса шин хьунадакьлай бивкIсса чIумалсса цала асардаяту.


[dropcap]В[/dropcap]ихьуллал оьрчIал багъраву тарбия буллай бур кIива оьрчIал группа, ца – мюрщиминнал, гамур – хъуниминнал.
Цалчинмур шадлугъ-байран дуруна мюрщиминначIа. Ва группалул тарбиячину бур цила даву хъинну ххуйну кIулсса Халилова Аьйша. ЧIюлу бувну бия къатта, елка бивхьуну, шарду лавххун, цаймигу чIю­лушивурттал.

ЦIусса шин барча дуллали­сса махъ лавхъуна оьрчIал багърал каялувчи ХIусайнова Зали­ххал. Ванил бувккуна Аьлиханова Сиянатлул Вихьуллан хас був­сса шеъри. Гихуннай оьрчIал ккаккан дуруна Халилова Аьйша ва Мяммащаллаева Мариян бакIчину хIадур дурсса программа: бувккуна шеърирду, увкуна балайрду, бивзуна къавтIун. Гьай-гьай, цинявннайгу дия хъинну исвагьийсса яннарду. Яла Дякъил-Ттаттал дуллуна циняв оьрчIан цала кьуцурттувасса бахшишру.

Укуннасса тяхъашиву хьуна бугьарами оьрчIал группалувугу. Вайннал ккаккан бувна театрал зумунусса, ЦIусса шинан хас бувсса номерду. Хъинну хIарачат бувну бия тарбиячитурал вай хIадур буван. ДакIних ккалаккиссса шеърирду, цавагу махъ лях гьан къабувну, ккалай бия. ВайнначIама Дякъил-Ттатта ия ва группалувасса оьрчI. Цувагу хъинну авурну дугьлай ия Дякъил-Ттаттал роль. Ваналгу дарчIуна циняв оьрчIайх бахшишру. Ххарил «лехлай» бия циняв.