Декабрьданул 21-нний Дагъусттаннал Журналистурал союзрай, гьар шинах дуллай жулла республикалий аьдатравун дагьсса, ливтIусса журналистурал аьпалун хас дурсса батIаву хьунни.
Ванил сакиншиннагу дурну дия, муданна кунна, Дагъусттаннал Журналистурал союзрал хъунама Аьли Камаловлул.
З. АьбдурахIманова
БатIаврий гьуртту хьунни республикалул СМИ-рдал редактортал, журналистал ва жяматийсса ишккаккулт. Шиккусса агьамми ихтилатругу оьрмулуцIа хьусса журналистуран гьайкал дишаврин хасъсса хьунни. Аьли Камаловлул бавтIминнахь бувсунни гьайкалданул макет хIадурну душиву ва утти му республикалул хIукуматрал даражалий цIакьгу дурну, му дувансса 7 миллион арцул итабакьин тIалав бан аьркинну бушиву. Бия ва иширая цивппа къарязишиву бусласисса журналисталгу.
Мисалдаран, «Новое дело» кказитрал хъунама редактор ХIажимурад Сагитовлул кIицI лавгуна тIайлашиврул цIаний жанну дуллусса журналистурансса гьайкалданунсса арцу хIукуматрая тIалав дуллалаву къатIайлашиву, ва ми датIин аьркиншиву журналистурал цала хIарачатрайну. БатIаврил гьурттучитурал ванал тIимургу къулагъасралун лавсун, ччясса мутталий ца пикрилийн бучIан аьркиншиврий бавцIунни.
