[dropcap]Н[/dropcap]иттил увну чIал къархьуну хьун нанисса 120 шинал таварих­рацIунгу бавхIуну, ттун цаппара затру учин, чичин ччан бивкIунни жула шяравучу МахIаммадлул арс Аьбдуллаев Кьурбан­махIаммадлуя.

1910 шиная 1917 шинайн ияннин КьурбанмахIаммад зий ивкIссар Кубаннай дучрал эн­тту, хьхьуртти, дувай­сса дуссу­къатлуву чагуртну. 1917 шинал зана хьуну буттал шяравун, 1923 шинайн ияннин зий ивкIссар хъу-лухччинуха, ятти-гъаттараха. Муния махъ Омск шагьрулийн лавгун, ти­кку цаппара шиннардий къалайчишиву дуллайгу ивкIун, ялагу зана хьу­ссар буттал шяравун. Най уна зун ивкIссар ГьунчIукьатIрал «ЯтIул партизан» колхозрал яттил фермалул бригадирну. Му ферма кьамул дурсса чIумал ванахь бивкIун бур 216 яттил хIайван, миннувату – 180 тта. 1935 шинал ахирданий КьурбанмахIаммад увчIуссар ГьунчIукьатIрал колхозрал председательну. Яттил ферма цаманайн тапшур дуллалийни, ванал 3200 яттил хIайван тапшур бувну бур.

1935 шинал Кьурбан­ма­хIаммад Щалагу Совет хIу­куматрал колхозниктурал Москавлий хьусса Совет Союзрал колхозниктурал 2-сса съезд­рал делегатну гьуртту хьу­ссар. Му съездрай ванан Михаил Калининнул дуллуссар орден «ХIурматрал лишан». Лакрал райондалий ва хъанай ивкIссар мукунсса цалчинсса орденоносец. Ванал хIурмат, гьарца кIанттай хъинну лавайсса бивкIун бур. Му мукун бивкIшиву чIалачIи буллай бур укунсса ца иширал, 1935 шинал ванал КалининнучIан колхозран машина була тIисса ча­гъар чивчуну, гара шинал цIусса «полуторка» буллуну бур. Га машиналул шупирну зий ивкIссар ХIажиев Рапикь.

КьурбанмахIаммад ивкIссар аьжамрай бакъа буккин-чичин къакIулсса зунттал чув. Амма мунан кIулну бивкIссар, чIявуми зунттал чиваркIуннан кунма, гьарцагу къурушрал кьимат, гьарцагу ризкьи, цукун ябуван аьркинссарив. Мунияту, 15 шинал мутталий тай яла захIматми дяъвилул шиннардий каялувшиву дуллай, ГьунчIукьатIрал «ЯтIул ттугъ» колхоз щалагу Дагъусттаннай хьхьичIунминнувух хьун дурссар. Дурккусса акъанагу, Дагъусттаннай шамилчин мурчай гьарахъалу 1946 шинал КьурбанмахIаммадлул тIалав дурну, «Дадакиши» тIисса даэлий дацIан дурну диркIссар. 1944 шинал даэлий, авлахъ гъай увкуну, лачIа бувгьуссар. Даэлий бугьлан бивкIссар лачIа, шагьнал лачIа, бахча, къюмайтIутIи. Яттил аьдад лархъссар 24 азарва хIайвандалийн. Оьллал ферма шанна хьуссар, диркIссар ду­чрал илхъи.
Вана укунсса, аьрщарал, ризкьилул хIал ххуйну кIулсса каялувчи ия КьурбанмахIаммад. Цал бунагьирттал аьпа баннав, жяматрал цIаний мунал дуллай ивкIсса ххуй-ххуйсса давурттугу личIаннав ирсирай хъамакъабитулул ххуллий.

Амин Аьбдуллаев