[dropcap]В[/dropcap]ай гьантрай МахIачкъалаллал 30-мур лицейрал 7 классраву дуклакисса Абакар ХIажиясулов, менингококкрал азардануща ххассал ан къавхьуну, кIива гьантлул дянив дунияллия лавгсса хаварданул биялсса аваза бувтунни шагьрулул агьалинавун.

П. Рамазанова
Ва школалул директор Светлана Малиотакил бувсмунийн бувну, январь зурул 9-нний класс­рукнал дарсирдая шавай гьан увну ур инжитсса оьрчI, ва къашавай усса хавар шайхту. Хъирив кьини азарханалийн увкIсса оьрчI ххассал уван къавхьуну бур. Шиккува бусан, оьрчIал нину ва хъуннабавагу хIакинтал бусса бур, амма лавмартсса азар ялун личин дуван захIмат шай­сса дур. Минздраврал баян бунни «Панацея» тIисса заллу усса клиникалул оьрчIан диагноз тIайлану къадирхьушиву (геморрагический васкулитран ккалли дурну), республикалул ОьрчIал клиникалул азарханалийн тIайла ув­ккун ивкIшиву, тикку тайннал тIайлану диагнозгу дирхьуну, реанимобильданий мугьлат бакъа тIайла увккун ивкIун ур респуб­ликалул лахъай азардал азарханалийн.

Хъинну анаварну ппив шай­сса ва журалун чаран бакъасса бур, оьрчIгу ва азарханалул реанимациялий къуртал хьуну ур. Минздраврал баян бувмур инкар бунни «Панацеялул» гендиректор Зураб Мирзаевлул. «ОьрчIал нину жучIа хIакинну зий бухьукун, укра анализру дулун бувкIссар оьрчIащал, анализругу дуллуну, ми ОьрчIал азарханалийн лавгссар, жул хIакинтурал оьрчIал азарданул диагноз къадирхьуссар»- тIий ур Зураб Мирзаев. ХIажиясуловхъал кулпатмур я «Панацеялий», я щийчIав тахсир къавхьуссар тIий бушиву буслай бур цаппара изданияр­тту. Хаварду, тIарду ливчIунни, 13 шинал оьрмулувусса оьрчI дунияллия лавгунни…
Шагьрулул кIулшиву дулаврил управлениялул хъунама Закир Каидовлул баян бунни Абакардущал ва мунал хъунмур ссищал 11 классраву дуклай бивкIминнал цIуллу- сагъшиврул ялув бавцIуну бушиву ва ми классирттаву карантин баян бувшиву. Бувсунни школалийгу дагьайкун дезинфекция дуршиву.