«Дараччи» клубрал Президент Мариян Илиясова буссия, миллатрал маз ябаврил, магьирлугъ хьхьичIуннай даврил цIаний зунсса ккуранну цаппарасса щархъаву сакин дурну,

лирчIми щархъавугу сакин дансса пикрилий. Ккурандалул даву дяличIан къаритан мунил хъар цийнна ларсъсса Гульшан Хасаеван пикри хьунни ми ккуранну къадиркIсса щархъаву сакин дан, хIура дуркмигу цIунил цIу дуккан дан.

---

З. Тахакьаева
Му ниятрай ттигъанну лавгунни Гъумукун. ЦIубутIуй чялишну зий диркIсса райцентрданийсса ккуран махъсса шиннардий дарцIуну дия. Му цIунилгу щурущи даву мурадрай, мунил хъунмурну бивтунни БатIа МахIаммадова, ванил кумагчину – Гъумучиял школалул директор Ххадижат ХIусниева. Ккурандалул сияхIрай бур райондалул КIулшиву дулаврил управлениялул пишакар Диана Къажлаева, «Солнышко» детсадрал хъунмур Зулайхат Макьсудова, Гъумучиял школалул учительницахъул Роза Бавасулайманова, Барижат ХIасанаьлиева, Ххадижат Парамазова, райондалул полик­линикалул хъунмур Марианна Рамазанова.

Ккурандалул чулуха Гъумучиял школалун Гульшаннул пишкаш бувунни ттигъанну дунияллийн бувксса Эся Аьбдуллаевлул шанма словарь ва Мариян Илиясовал аьпалун хас був­сса луттирду.
Муния махъ Гульшан Хасаева ва БатIа МахIаммадова хьунабавкьунни ГьунчIукьатIрал шяраваллил ккурандалущал. Ши­ккува кIицI бан, «Дара­ччилувун» духлахисса ккураннаву ца яла чялишну зузимурну хIисав хъанай дур му ккуран. Мунил хъунмур Сарижат Къушиевал бувсунни махъсса шинал лажиндарай ккурандалул дурсса давурттая. ХIакьину ГьунчIукьатIрал ккурандалувун бухлай бур 18 хъамитайпа. Ихтилат бия вания тихуннай дан дакIнийсса давурттаягу.

Муния махъ хъамаллурал ххал бунни школа. ЖанахIравун лархъсса стендирттайхчил кIул хьунни школалулгу, шяраваллилгу авадансса тарихращал. Хьунабавкьунни дуклаки оьрчIащал. КIицI лавгунни лакрал миллатралгу, республикалулгу, хIатта щала Аьрасатналгу тарихраву ГьунчIукьатIрал шярава бувксса инсантурал цIарду хьхьичIунсса ххуттай душиву.