Жула хъуншагьрулий, ххуллурду бакьин буллалисса федерал программа дакъасса, щуруй дуссар «Формирование комфортной городской среды» тIимур проектгу.
Вай гьантрай ва проектрал лагрулий бакьин бувсса Аьрали- интернационалистурал парк тIитIлатIисса шадлугъгу хьунни.
Залму АьбдурахIманова
МахIачкъалаллал бакIчинал буржру биттур буллалисса Мурад Аьлиев акъасса,шикку гьуртту хьунни СССР-данул КГБ-лул генерал-майор Оьмар Муртузялиев, ДР-лул Аьрали комиссариатрал хъунама Муртуз Идрисов ва цаймигу жяматийсса ишккаккулт.
«Жу жущава шайсса хIарачат бувссия, ва парк буруччинсса мурадрай. Республикалул бакIчиналгу кумаграйну шикку ххуйсса хъуннасса даву дан бювхъунни жул пишакартураща»,- кунни Аьлиевлул цала ихтилатраву.
Парк бакьин бувссар гьануцIакул. Цал бух хьусса, кьавкьсса мурхьругу ххуку бувну, даххана дурссар аьрщаравухсса 37 тталлучIансса ттукIрал ххаллу, бивхьуссар халкь щябикIансса 15 скамейка, бувссар жагьилтурал цалла цIуллу-сагъшиву цIакь дуллансса воркаут-майдан ва мюрщи оьрчIру бялахъланссагу майдан. Халкь сайр буллансса кIанттурдайх даркьуну дур 4000 кв. м. плиткалул. Бахьттагьалтрансса ххуллурдацI бувгьуну бур мурхьру ва къатIри. Паркравун буххайсса кIанайгу бувну бур ванил чIалачIин хъиннура авур дуллалисса кIалан. Гъилишиву дагьлай, инт гъан хъанан дикIайхту, «Горзеленхоз» МУП-рал зузалт тIутIив дугьлай булукьинтIиссар.
Парк бакьин баннинма шикку дирхьуну дуссия Авгъаннаву 1979-1989 шиннардийсса дяъвилий жанну харж дурсса аьралийтурал аьпалунсса арт-объект. Вагу цIу дурну, лагмава чирахъругу лавхъун, ваний жаннацIа хьусса саллатIтурал суратругу дирхьуну дур. Паркрал ца цамургу чIюлушинна хьуну дур –шикку жула зунттал чарттая бувсса щаращи. Шагьрулий ца яла лахъисса Шамиллул кучалуцIухсса, уттинин ца яла бизарсса, халкьуннан къамуксса сийлий бивкIсса ва парк утти ца яла тIааьнмур ва ххирамур кIанттуну хьунтIиссар.
