Росгвардиялул зузалтрал барча бунни журналистал

[dropcap]Я[/dropcap]нварь зурул 14-нний Каспийскаллал ОМОН-далул базалий, Аьрасатнал печатьрал кьинилуцIун бавхIуну, Дагъусттаннал журналистуращал хьунабавкьунни Росгвардиялул зузалт. Республикалул СМИ-лул вакилтуращал хьунабакьин бувкIунни Дагъусттаннал Росгвардиялул управлениялул хъунаманал кумагчи,полициялул полковник Константин Шиян,кьюкьлул командир,полициялул полковник Шамил МахIамаев ва цаймигу зузалт.


А. Аьбдуллаева
Управлениялул зузалтрал, шинай дурмунил хIасиллугу дурну,кказитирттал редакциярдащал ва информациялул агенствардащал уттиния тихунмайгу хIала-гьурттуну зунсса ма­съала ххал бивгьунни, бувсунни цIусса щинал дан дакIнийсса давурттая,оьвкунни журналистурайн март зурул 27-нний Рос­гвардиялул кьинилун хасну хьунтIисса мажлисрайн.
-Зул ведомствалущал зун жунгу бигьану бур, цичIав захIматшиву къадикIай зуяту чIумуй аьркинсса информация кIул бан, зу тачIавгу хIура дуллай бакъару журналистуращал­сса дахIаву,-увкунни «Mirmol.ru» сетевой изданиялул хъунмур редактор Диляра ХIасановал.

Хъирив, Печатьрал кьинилущал барчагу бувну, шадлугърал даражалий Росгвардиялул Управлениялул хъунама,полициялул генерал-майор МахIаммад Баачиловлул чулухасса бахшишру дуллунни ведомстволул даву ларайсса даражалий аьч дуллалисса журналистуран.Бахшишран лайкь хьунни «Илчи» кказитрал зузала Андриана Аьбдуллаевагу.
Ахирданий Шамил МахIа­маевлул ккаккан бунни журналистуран ОМОН-далул база — ­классру, спортзал, столовая, общежитие ва цаймигу къатри, бувсунни отрядрал тарихрая ва зузи кьинирдая. Журналистурал рирщунни отрядрал зузалтращал дакIний личIансса суратру.