Ядигарсса луттирду

[dropcap]Я[/dropcap]нварь зурул 16-нний Дагъусттаннал паччахIлугърал университетрал филологиялул факультетрай хьунни шагьрулул школарттал ниттил мазрал дарсирдал учительтурал семинар.

Имара Саидова
Ва даврил сакиншинначиталну хьунни МахIачкъалаллал КIулшивуртту дулаврил управление ва ДГУ-лул ниттил мазру лахьхьаврил Центр.
Семинардал программалул лагрулий ниттил мазрал дарсирдал учительтуран, библиотекарттан ва методикалул кабинетирттан буллунни ДР-лул Миллатирттал политикалул ва диндалул иширттал министерствалул харжлухрах итабавкьу­сса Дагъусттаннал мазурдийсса луттирду.

ДГУ-лул Ниттил мазру лахьхьаврил Центрданул директор Марина ХIасановал бувсунни ниттил мазру ябаву мурадрай дуллалисса давурттая. Мукунна семинарданий дунни цIуну итабавкьусса луттирдал презентация. Презентацияртту дурминнувух бия «Дагъусттаннал учаларттаву ва бусаларттаву­сса инсаннал сипат», «Къумукьнал инсантуран дирзсса цIардал словарь», «Даргиял мазрайсса фразеологиялул словарь», «Совет заманная шихунмайсса Да­гъусттаннал антологиялул поэзия» тIисса луттирду.
Шиккува кIицI лаган, элект­рон журалий вай луттирду буккин бюхъайссар интернетравугу.